المواطن سعيد يكتب: رمضان اتسرق "قصة حقيقية"
أحمد سعيد
فى الساعة الثامنة من مساء أول أمس، الأربعاء، ليلة أول أيام شهر رمضان المعظم، وبعد تعرضه للسرقه، سأل المواطن سعيد نفسه : ايه اللى بيميز شهر رمضان الكريم؟
فأجاب لنفسه: كفايه انه كريم، ولو دورت هتلاقيه كمان شهر التوبه، وغض البصر، والتقرب من الله، والبراءة، والإستغفار، إضافة إلى أى صفة “حلوه” تخطر على بالك..
ورغم الإجابة الشافية والوافية التى أسمعها المواطن سعيد لنفسه، إلا أن قلبه المطمئن فشل فى إقناع عقله “المش مطمئن”، ثم قال:
1- “التوبه”.. ليلة أول يوم رمضان، اللى هو امبارح، اتسرقت قدام وزارة الزارعة فى الدقى من 3 شباب زى الورد، طلبوا مساعدتى فى تغيير عجلة “الموتوسيكل”، ولأنى شهم وجدع متأخرتش و”شمرت” دراعى، وهوب قام واحد فيهم عمل نفسه مختل عقليا وبدأ يخبطنى يمين وشمال، وزمايله يقولولى حقك علينا أصله مريض نفسيا، ولأن قلبى أبيض سامحته، وبعد دقيقه من مغادرتهم اكتشفت ان أخونا المختل عقليا نشل الموبايل فى خبطه من خبطاته.. ساعتها قلت لنفسى هما أكيد هيتوبوا بس بعد ما يسرقونى..
2-“غض البصر”.. أول يوم رمضان، اللى هو امبارح برده، فوجئت بزميله عزيزه لبست الحجاب، قلت فى سرى بسم الله الهادى، ربنا يزيدك ايمان، هو ده الإلتزام، الله عليكى، بس لو كنتى تغطى خصلة الشعر اللى نازله ع الجنب دى، كان الحجاب يكمل، ويا سلام لو كنتى كمان توسعى بس البنطلون شوية، والبلوزه كمان تطول حبه تبقى فله..
وانا بكلم نفسى وهيمان فى الجو الرمضانى الروحانى الجميل اللى ساهم فى التزام الزميله العزيزة، ألاقى زميل عزيز برده، بيقولها متهكما “أجل يا سيدى”، تشبيهاً بالفنانة ميسرة فى فيلم “اللمبى 8 جيجا”، لترد عليه الزميله بضحكة “نصف خليعه”، قائلة “أجل يا سيدى”..
3- “التقرب من الله”.. صحيح مش معناه إنى أقرأ قرآن 24 ساعة، أو إنى أدرس أصول الدين، لكن برده مش معناه انى اخاف اتفرج على مسلسلات شهر رمضان الكريم، خوفا من ايحاءات خارجه، أو مشاهد عارية، أو ممثل بيقول لممثله “متيجى ونجيب مليجى”..
4- “البراءه”.. صعب أوى تتصدم فى حد انت بتحبه وراسم له صورة مثاليه فى خيالك، وده بينطبق على الفنانين، خصوصا لما تلاقيها فنانه اد ايه “كيوت” ومؤدبه فى مسلسلاتها وأفلامها، حاجه كده “بسكوته” متطلعش العيبه من بقها، وهوب تلاقيها فى برامج المقالب لبست الملايه اللف و”بتشرشح” للمذيع أو المذيعه، لدرجة انك بتصدع من صوت الـ”بييييييب” اللى بيلغوشوا بيها على ألفاظها.. ويشاء العلى القدير برده ان صدمتك دى بتكون غالبا فى شهر رمضان اللى بيستنوه لاذاعة برامج المقالب..
5- “الإستغفار”.. نفسى أعرف ايه علاقته بالملابس “منزوعة الدسم”..
الخلاصة.. شهر رمضان الكريم اتسرق، واتنشلت منه صفاته السابق ذكرها، ورغم ان المفروض تتجه لأقرب قسم شرطة للإبلاغ عن السرقة، لكن منصحكش، لأنى لما عملت كده بعد ما موبايلى اتسرق، كل اللى اخدته من قسم الشرطة “حتة” ورقة بيضاء مكتوب عليها 9918 جنح الدقى..