عبد الله غلوش يكتب: غلوشيات رمضانية (1)
– خالد النبوي .. ممثل عالمي بجد
– حواري بوخارست .. 5 مرات (يابن الكلب) في حلقتين.
– علي ربيع عامل 3 مسلسلات والشيخ علي جمعة عامل 6 برامج.
– الدكتواره سبب غياب معز مسعود ، والحمل سر اختفاء روبي.
-من كتر المسلسلات المشاركة فيها السنة دي ، بقي عندي احساس ان ايتن عامر هاتعتزل بعد الجواز.
– بسبب دنيا سمير غانم ، مرتضي منصور من امبارح بقي اسمه مورتاديلا.
– ليه mbc مصر مش hd زي باقي قنوات MBC، وليه هي القناة الوحيدة في المجموعة اللي مافيهاش خدمة الـ EPG لغاية النهاردة؟
– مفتقد فوازير نيللي وشريهان واعلانات بوكسرات هاني رمزي.
– علي سيرة البوكسر .. حسن حسني هو نجم حملة قطونيل السنة دي .
– احمد عبدالعزيز ومحمد رياض ووفاء مكي رجعوا يمثلوا ومرسي لسه مارجعش.
-مالا يعرفه كثيرون ان في برنامج مقالب رابع في طيارة هو كمان بيتعرض علي قناة تونسية.
– (شالو ألضو جابو شاهين .. شاهين قال مانتوش لاعبين) .. أهو شاهين ده مات النهارده ربنا يرحمه.
– الفرق بين ظافر عابدين في “تحت السيطرة” ودوره في “فرق توقيت” مع تامر حسني السنة اللي فاتت ، اسم الشخصيتين فقط.
” – بعد البداية” فيه شغل حلو بس للأسف خالد سليم قافلني من المسلسل.
– هو سيد رجب لو مطلعش بلطجي في مسلسل ممكن يحصل له حاجة؟
-اجمل ما في “مولانا العاشق” تتر ياسين التهامي.
– 100ريختر .. شوية دعاية زيادة وهايبقي من اعلي البرامج مشاهدة ع التليفزيون و ع اليوتيوب.
– هل تعلم ان (النهار) فاتحة قناة دينية جديدة مافيهاش برنامج ديني واحد؟
– احمد بدير متقمص شخصية ممتاز القط في “استاذ ورئيس قسم” بإمتياز
– اخبار القبض علي الفنان الفلاني او زواج الفنانة الفلانية وفي الاخر يطلع في احداث مسلسل ، بقت موضة قديمة أوي.
– س: كام ممثلة عندها جرأة غادة عبدالرازق في الظهور طول المسلسل بدون ماكياج؟