عبد الله غلوش يكتب: غلوشيات رمضان 2020
-مع نهاية رمضان ومع عرض ملحمة البرث من شوية، شكرا لكل واحد ساهم في خروج المسلسل ده للنور وربنا يرحم كل شهدائنا ويحفظ جيشنا وبلدنا.
– شكرا للقائمين على صناعة الدراما بشكل عام وأخص بالذكر سينرجي والمتحدة للخدمات الإعلامية، مبدئيا الكمال لله وحده ، ولكن في ظل الظروف التي تشهدها مصر والعالم، اللي حصل السنة دي في رمضان يعتبر انجاز وشغل جيد ومحترم ، تلافى كتير من سلبيات السنين اللي فاتت ..
– كما ذكرت من قبل، أجمل ما في دراما هذا العام هو التنوع .. دراما ودموع موجود .. اكشن موجود .. رومانسي موجود ..كوميدي موجود .. فانتازيا وخيال علمي موجود .. مصر زمان .. مصر نوستالجيا التمانينات .. مصر في مواجهة الارهاب .. مصر الحارة ومصر التجمع ..
– بالتأكيد مش كل المسلسلات حلوة وبالتأكيد كمان ان كلها معجبش حضرتك بس اللي معجبكش ممكن يكون عجب غيرك وبالتالي مسلسلات السنة دي نجحت في رأيي بعكس السنوات السابقة في انها ترضى رغبات الكل وتشبع اهتماماتهم وكل واحد فينا كان عنده مسلسلين او تلاته على الأقل معجب بيهم ومتابعهم وراضي عنهم ..
– ظروف الكورونا وآفة درامتنا وهي التأخر في انطلاق تصوير المسلسلات حالت دون ظهور أعمال تانية قوية كانت ستساهم في نجاح الموسم بشكل اكبر واعتباره الأفضل من سنين طويلة، زي “هجمة مرتدة” لأحمد عز وهند صبري و “تقاطع طرق” لمنى زكي وفراج وتايسون و “القاهرة كابول” لخالد الصاوي وحنان مطاوع وطارق لطفي و “سيف الله” لعمرو يوسف، ورغم كده فرحان انه مكنش في مكابره في المخاطرة والمجازفة بتقديمها السنة دي.
– ما اسعدني أيضا هذا العام، هو اتاحة الفرصة لعدد كبير من المنتجين للتواجد وتقديم اعمالهم .. موجود احمد عبدالعاطي ، موجود جمال العدل موجود هشام تحسين ورامي امام ، وقبلها كان في الجابرية واروما وغيرهم في مسلسلات الأوف سيزون، وبالتالي مفيش حاجة اسمها احتكار للصناعة، ده بخلاف المنتجين اللي قدموا اعمالهم في باقي المحطات مثل ام بي سي مصر والنهار والقاهرة والناس وصدى البلد ووصلت عدد مسلسلاتهم إلى ١٥ مسلسل، وبالمناسبة معظمها اعمال محترمة وجيدة الصنع.
– بالنسبة للقنوات وبتكلم هنا عن “الحياة واون وسي بي سي ودي ام سي”، نجحت بالإضافة للمسلسلات في تقديم محتوى حافظ بشكل كبير على قدسية الشهر الفضيل من حيث عدد البرامج الدينية وجودتها، بجانب توفير كافة الإمكانات لنقل شعائر صلاة الفجر في العشر الأواخر بإحترافية وجودة عالية.
– بعيدا عن المحتوى، اللي لفت نظري انهم اعلنوا خريطتهم الكاملة وبالمواعيد قبل رمضان بأيام بعكس السنين اللي فاتت اللي كنت بأحس فيها بنوع من التخبط والتعامل مع الموضوع على انه سر حربي، كمان جدول البث من اول يوم ولغاية النهارده مظبوط بالثانية، كل مسلسل بيبدأ عرضه في معاده اللي تم الاعلان عنه من قبل رمضان، مفيش خريطة اتغيرت بعد اسبوع، مفيش برنامج يوم يتعرض قبل مسلسل واليوم التاني يتعرض بعد نفس المسلسل، مفيش حذف وقص للتترات، حتى طول الفواصل الاعلانية لم تكن مستفزه ومنفره مثل السنوات الماضية.
– سامع حضرتك بتقول ما اللي انت بتقوله ده بديهيات والمفروض يحصل في اي قناة كبيرة ومحترمة، عارف والله بس ده للأسف مكنش بيحصل السنين اللي فاتت والمؤسف انه حصل من بعض القنوات الأخرى السنة دي كمان.
– عجبني أيضا مراعاة مواعيد عرض المسلسلات مع مواعيد عرضها خارجيا على القنوات الخليجية المفتوحة او المشفرة واللي كانت دايما بتسبق قنواتنا وتحرق المسلسلات عليها، عشان كده شوفنا مسلسل زي “فرصة تانية” بيتعرض لاول مرة قبل الفطار في ظاهرة جديدة علينا بالتزامن مع عرضه على ام بي سي دراما.
– اللي حصل مع “فرصة تانية” حصل مع كل المسلسلات التي تم توزيعها خارجيا تقريبا مثل “البرنس وفالانتينو ونحب تاني ليه وبـ١٠٠ وش” وغيرهم ويمكن كان الاستثناء الوحيد هو الاختيار .
– سعيد بعودة بث قناة الناس وأتمنى استمرارها على البث الأرضي والفضائي خاصة اننا في أشد الحاجة لقناة تنويرية تخاطب البسطاء وترشدهم إلى صحيح الدين، وسعيد أيضا بإنطلاق البث الرسمى لقناة مصر للقرآن الكريم وتبنيها للعديد من الأصوات والمواهب المصرية في تلاوة القرآن.
– واتش ات في أفضل حالاته منذ ظهوره للنور، رغم انه لسه فيه بعض السلبيات أهمها يتعلق بضرورة توافر عدد لا بأس به من افراد خدمة العملاء للرد على استفسارات وشكاوى المشتركين، وكذلك تزويده بإمكانية استخدام الإشتراك على أكثر من جهاز في نفس الوقت، لكن مقارنة بالعام الماضي الأبليكاشن تطور بشكل كبير، بسيط وسريع وغير معقد وأصبح متوفر على عدد من أجهزة سمارت tv وقيمة الاشتراك معقولة مقارنة بقيمة الاشتراك في باقي المنصات المنافسة.
– في رمضان السنة دي لاحظت استغلال أمثل لقناة اكسترا نيوز وتحويل معظم برامج التوك شو الرئيسية للعرض على شاشتها لمواكبة تداعيات ازمة كورونا، كمان نجحت القناة الاولى في استعادة جزء كبير من بريقها وإن كنت اتمنى ان واحد من مسلسلاتها يكون بيعرض عليها حصريا ومتكونش كلها بتعرض بالتزامن مع باقي المحطات.
– اتمنى كمان نبقى عارفين من النهارده عندنا ايه في رمضان الجاي وبالتالي ناخد نفسنا وراحتنا في التصوير والحلقات ترجع مرة تانية ٤٥ دقيقة مش ٢٥ زي ما حصل مع بعض المسلسلات وتحديدا في الحلقات الأخيرة.
– اتمنى الرقابة يكون صدرها واسع شوية وتحديدا مع الأعمال الكوميدية ، ويمكن مسلسل زي “بـ ١٠٠ وش” كان مثالي في التعامل الرقابي بعكس مسلسلات أخرى.
– اتمنى نعمل مسلسلات كتير زي الفتوة والاختيار ، وأتمنى نحافظ على فكرة تواجد الخبرات والنجوم اللي بقالهم فترة غايبين وكانوا منورين الشاشة السنة دي زي عهدي صادق ومجدي فكري واحمد خليل وغيرهم.
– اتمنى اني مكونش طولت عليكم .. مبروك للجميع، الكل اتشاف والكل تعب واجتهد بطريقته عشان يقدم اللي يرضينا وفقا لرؤيته ولإمكاناته، يارب اللي مكنش موفق السنة دي يستفيد من غلطاته واسف لو صدر مني أي تعليق ضايق أو أزعج أي حد طول رمضان وكل عيد وانتم العيد نفسه.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.