رأي أسامة كمال في عودة الدوري المصري

تساءل الإعلامي أسامة كمال خلال حلقته اليوم من برنامج “مع أسامة  كمال” عن حالة الشد والجذب بين أولياء أمور طلاب الثانوية العامة والشهادات الجامعية ومشجعي كورة القدم بشأن عودة الدوري، قائلا: “عايز أبدأ من سؤال، ليه كل حاجة في مصر خناقة؟ ليه كل موضوع فيه طرفين متناحرين؟ لو ايديتكم أمثلة هبقى بضيع وقتكم لأن كل واحد عارف بدل المثال 20، فنسأل نفسنا وخصوصاً في خلاف الرأي مع الحكومة “.

نرشح لك: “حمايتكم حق لينا”.. أسامة كمال يعلن تضامنه مع الأطباء

وأضاف “هل احنا سايقين فيها؟ وللا الحكومة متعنتة؟ ونسأل الحكومة، هل انتي مش شايفة إن اشراك الناس في القرارات، وخصوصا القرارات اللي بيتم التجهيز ليها في وقت مش قليل، ناخد الرأي، نستطلع، نفتح حوار بشكل من الأشكال.. مش بتكلم في القرارات العاجلة، لأ القرارات المستريحة في الوقت”.

وعلق علي التصريحات المتضاربة بخصوص عودة الدوري المصري قائلا: “التواصل بين اصحاب اللعبة كلهم لازم يحصل ويتوافقوا ويرفعوا رأيهم للدولة اللي في النهاية هتقول في كورة أو مافيش، بس كدة”.

وعن امتحانات الثانوية والشهادات الجامعية علق: “لو امتحانات الثانوية اتلغت، هل معقول الولاد يدخلوا الجامعة بناءاً على بحث أو امتحان أون لاين؟ أكيد لأ، لأن في الامتحانات اللي ما تأثرش الولاد ماعملوش البحث ولا الامتحان اون لاين، المامهات هم اللي عملوا وأرجوك ماتقوليش ما حصلش عشان هو حصل، في كل أنواع المدارس، العادي والهاي لايف، الا من رحم ربي وسمعتوا موضوع مامة منى طلعت الأولى ومامة رشا التانية ومامة يوسف التالتة والكلام دة”.

أردف أسامة كمال: “هل قلنا اللي عنده اقتراح عشان السنة ماتضيعش ع الولاد والامتحان يبقى عادل للكل فندرسه وناخد بيه؟ ولا حد طلع بحل معقول وولا حد طلب الحل وولا حد اتشاور لكن الكل اتخانق مع الكل”.

يسعي الإعلامي أسامة كمال من خلال برنامجه فرز العديد من الأخبار بعيدا التهويل والتهوين، لتضع المشاهد والمتابع في إطار صورة واقعية وحقيقية، ويذاع البرنامج يومي الأحد والأربعاء الساعة 12.30 ظهرا.