المواطن سعيد يكتب: أمناء شرطة النجدة الأقباط "أسلموا"
السبب الوحيد اللى يخليك تتصل بشرطة النجدة .. هو انك فى خطر يتطلب نجدتك..
رد الفعل الوحيد المطلوب والمنتظر .. هو ان النجدة تلحقك..
طيب تعمل ايه لو شرطة النجدة مردتش عليك ؟
هنفترض انك انسان صبور والمجرم اللى عاوز يقتلك هو كمان صبور .. وهيستنى معاك شرطة النجدة على ما ترد..
مش بس كده .. افترض معايا كمان انك والمجرم “اللى عاوز يقتلك” تناقشتم مع بعض حول سبب عدم رد “النجدة”..
ممكن يكون أمين الشرطة المسؤول عن الرد على هاتف النجدة بيصلى التراويح..
فى الحالة دى ممكن الشرطة تعين أمين شرطة “قبطى” للرد على هاتف النجدة فى رمضان..
لكن هنفترض ان أمين الشرطة القبطى أسلم وراح يصلى التراويح مع زميله المسلم..
مش الواجب أول ما يخلصوا الصلاة والتسبيح والدعاء وختم القرآن يتصلوا بالمواطنين اللى استغاثوا بشرطة النجدة ؟
لكن من امبارح الاثنين الساعة 9:27 مساء، ولحد النهاردة محدش اتصل بيا.. ومحدش هيتصل..
وبما انى مواطن ايجابى، طلعت على قسم شرطة الهرم أحرر محضر ضد شرطة النجدة بتهمة التخاذل، وتجاهل استغاثات المواطنين..
قالى أمين الشرطة انى لازم أحرر المحضر فى قسم الشرطة اللى انا تابع ليه، علما بإنى فعلا فى القسم نفسه “Smile face”..
اعتبرت ان أمين الشرطة مش فارقه معاه وعاوز يوزعنى، طلبت أقابل مأمور القسم وقولت أكيد هيكون أكثر ايجابيه من الأمين..
خرج لى المقدم “ماجد” نائب المأمور وقالى بكل احترام “حضرتك لازم تحرر المحضر فى مديرية أمن الجيزة.. مش هنا”..
واختصارا للوقت.. وخوفا منى كمواطن على وقت أمين الشرطة المسؤول عن تليفون النجدة، وعلى مئات اتصالات الاستغاثات خلال الوقت اللى ممكن أستهلكه عشان بس أحرر محضر..
قررت أبلغ السيد وزير الداخلية بالواقعة من هنا .. وأسأله ” لو المجرم اللى عاوز يقتلنى هددنى تانى .. أتصل بمين ؟ “..
ملحوظة.. اتصالى بالنجدة كان من ميدان الجيزة باستخدام هاتفى المحمول، للإبلاغ عن رجل فى منتصف العمر ملقى على الرصيف عاريا كما ولدته أمه، ولا يعلم أحد إن كان حيا أو ميتا..