عبد الله غلوش يكتب: غلوشيات رمضانية (5)
– صوت علي الحجار وحنان ماضي علي تتر “دنيا جديدة” .. خسارة في المسلسل.
– مش شرط المسلسل او البرنامج الحلو بس هو اللي يتعرض علي اكتر من محطة ، ولكن غالبا عشان رخيص.
– للأسف كريم عبدالعزيز كبر علي أدوار أبوعلي وحرامية في kg2
– رغم القضايا والمحاكم والمشاكل ، زينة عملت 3 مسلسلات في سنة واحدة .. أومال لو فاضية كانت عملت ايه؟
– وصلنا لمرحلة ان طوابير الكنافة بالمانجة بقت أطول من طوابير العيش.
– انتاجيا ، الف ليلة وليلة والعهد .. حاجة تفرح.
– بصراحة ، يوسف الشريف محدش بينافسه في المنطقة بتاعته.
– مفتقد بشدة ، اعلانات ما تقوم تطمن علي فلوسك ، والفازة اللي بنت حضرتك كسرتها دي بـ 1200 جنية.
– براءة احمد موسي افسدت صوم اكتر من نصف الشعب المصري النهارده.
– من اللي انا شايفه السنة دي خايف عمرو دياب يعمل اعلان روابي أو برسيل السنة الجاية .
– المخرج سامح عبدالعزيز .. أهم بطل في “بين السرايات”.
– الأسوأ من خالد سرحان في ” يوميات زوجة مفروسة ” ، خالد سرحان في “مولانا العاشق “.
– يبقي قران المغرب بصوت الشيخ محمد رفعت الأجمل في شهر رمضان.
– بالمناسبة ، قران المغرب مرفوع من حسابات كل الفضائيات المصرية بإستثناء ten و cbc ودريم 2 فقط.
– هيثم احمد زكي في استاذ ورئيس قسم ، بيفكرني بأحمد دومة.
– برنامج “محدش بياكلها بالساهل” فكرته حلوة ومختلفة ومصروف عليه وفيه مجهود كويس ، بس اللي عمل اللي بتقدمه دي مذيعة ظلمها.
– جهاز حماية المستهلك وشيبسي فوكس .. الأفضل من وقف إذاعة اعلان الناس كلها شافته واتكلمت عنه ، انك كنت رفضت عرضه من البداية.
– مسلسل ” طنط دولت فتح الباب” علي نجوم fm .. صلاحيته انتهت من 3 سنين.
– مش بس خالد النبوي ..( شيرين الطحان ، رمزي لينر ، هند رضا و عمر السعيد ) هايلين في “مريم”.
– “100ريختر” .. رغم ان فكرة الزلزال والارض اللي بتتهز عملها رامز قبل كده في “عنخ امون” ، لكن طارق فهمي قدر يعيد اكتشاف نفسه في برامج المقالب مرة تانية بعد “حيلهم بينهم”.
– شعار قناة crt ” انت اللي هتدور علينا” .. أتحدي يكون في حد بيعمل كده.
– لغاية النهارده معنديش سبب منطقي يخلي محلات الكشري تقفل في رمضان.
– ربنا يرحمك يا أمي ويرحم امهاتنا جميعا ويخلي أمهاتكم يارب.