عبد الله غلوش يكتب: غلوشيات رمضانية (6)
– في 72 ساعة فقط .. اطلاق سراح احمد منصور ، الافراج عن احمد موسي ، براءة اسلام البحيري .. فعلا رمضان كريم.
– خواطر الشقيري .. خسارة انها مرة واحدة في السنة.
– في رمضان السنة دي جمال سليمان عامل مسلسل سوري لبناني اسمه “العراب” وسبحان الله عاصي الحلاني عامل مسلسل لبناني سوري تاني اسمه “العراب” برضه.
– بدأت أشك ان غادة عبدالرازق هي اللي قتلت ابنها.
– للسنة الثانية علي التوالي ، كمية اللي بتشوفهم بياكلوا ويشربوا عادي في الشارع طول النهار، مرعب.
– “العهد” .. عارف ان الدراما خيال ، بس مش لدرجة اننا نقعد نموت في الابطال كل شوية ونرجعهم للحياة تاني ، انما للفانتازيا حدود.
– ما هو لو رمضان 15 يوم بس ، كان زمان اياد نصار رجع من الأسر تاني حلقة او اسرائيل مكنتش فكرت تيجي جنبه أساسا، بدل ما بقالنا 4 ايام بنتفرج ع المسلسل من غير حدث واحد جديد.
– عموما ، السبع حلقات اللي فاتت في معظم المسلسلات ، كان ممكن اختصارها في حلقتين او 3 بالكتير.
– “طلع الشرير اللي جواك” الأفضل علي نجوم fm ، و ” ليالي النقدية” الأجمل علي الراديو 9090.
– محمد لطفي .. مات افيهاتيا.
– “طريقي”.. صدمتي في تامر حبيب اكتر من أي حد تاني في المسلسل.
– “استاذ ورئيس قسم” .. الثوار مش مصدقين عادل امام والفلول متضايقين من عادل امام ، والاتنين مش بيفوتوا حلقة.
– بأي منطق حضرتك عايزني اعمل add والأكاونت بتاعك لا عليه اسمك ولا صورتك؟
– الأصعب من غياب الفخراني ، غياب عبدالرحيم كمال.
– بمنتهي الصراحة ، هشام عبدالحميد افضل من جسد دور الأب اللي ابنه مخطوف في الدراما.
– ريأكشن مشجع منتخب مصر اللي المذيعة بتسأله في اعلان شاي العروسة ، انت جاي تشجع مين؟ .. أحلي ما في اعلانات رمضان.
– منة فضالي “وش تاني” .. المصدر الخام للأفورة.
– الإخوة اللي متضايقين أن يوسف الشريف ليه أخ توأم من ام تانية في “لعبة ابليس” ، نسيوا ان الكبير أوي بيطلع له أخ توأم من أم تانية في اخر كل سيزون.
– ربنا يرحمك يا أمي ويرحم امهاتنا جميعا ويخلي أمهاتكم يارب.