"ربوا ولادكوا".. دليل مراد مكرم لتربية الأبناء بعد وقائع التحرش

علق الإعلامي والفنان مراد مكرم، على واقعة اتهام الشاب المدعو أحمد بسام زكي بالتحرش واغتصاب نحو 100 فتاة، من قبل مجموعة من الفتيات كتبت شهادتهن على “السوشيال ميديا”.

نرشح لك: حكاية هاشتاج أحمد بسام زكي متحرش

قال: “من امبارح بالليل لما بنتي قالتلي علي موضوع المتحرش والمغتصب ده، وأنا مانمتش وقاعد بقرأ في الموضوع وفي دراسات على النت وبتكلم معاكوا وبسمع من كل الناس.. وملخصي التالي نقطة نقطة ارجوكم اقروها كويس وشيروها لكل أصحابكم”.

جاءت الملاحظات كالتالي:

1- بنتك أمانة في رقابتك ليوم مماتك، حتى بعد ما تتجوز، أنت برضه أبوها وسندها وضهرها.. وأنت يا أم نفس الشيء، أنت الحضن والحنان والاحتواء.. اوعوا حاجه تبعدكم عن بناتكم.. ولا شغل ولا فلوس ولا سفر.. مشغول؟؟؟ تكلم بنتك 20 مرة في اليوم، اهتم بتفاصيل حياتها، فهمها مرارا وتكرارا أنك بتحبها، طويلة قصيرة تخينه رفيعة، بيضة سودا.. بتحبها زي ما هي اقبلها زي ما هي، أعمل كل ما في وسعك أن ثقتها في نفسها تبقى في السما.. ده خط الدفاع الأول.

2- فهموا بناتكم أن حتى بعد كل الاهتمام ده، لو غلطت ترجع لكم انتوا.. مش أي حد تاني، انتوا أولى بمشاكلها، ولا صاحبة ولا صاحب ولا قريب ولا بعيد.. فهموها أنكم هتجيبولها حقها الأول وبعدين تبقوا تتحاسبوا على الغلط.. بس وقت الجد هي ومصلحتها نمرة واحد.

3- فهموا بناتكم اللي بيحصل في الدنيا من غير تخويف، علشان ما تتعقدش ويأثر على حياتها بعد الجواز، فهموها بكل الطرق، كل حسب بيئته، ودينه ومعتقده.. مافيش حاجه اسمها اروح لولد في البيت.. طيب انتو open minded وعادي دول أصحاب.. ماشي يا ستي ويا سيدي، أنا مش هحكم على حد بس علي الأقل تبقوا عارفين رايحة فين ولمين وتكلموا أهله تتأكدوا أنهم في البيت وتتصلوا بيها كل شوية.. بقول ده وأنا مش مقتنع لأني أنا صعيدي وماعنداش الكلام ده أصلا، بس معلش أنا يهمني المعلومة توصل لكل الناس.

4- وده الأهم.. ربوا ولادكم.. ربنا هيحاسبك على الولد اللي سبته يتعلم الأخلاق من النت والأصدقاء.. حتى لو أنت ماتربيتش وأهلك رموك في الشارع، خلي ولادك أحسن منك بالتربية أولا ثم فهم الدين صح.. علمه ازاي يفرق بين الحلو والقبيح، علموا يطبق ده علي كل حاجه بيسمعها وبيشوفها و بيعملها.. عمره ما هيمشي ورا فتاوى شاذة.. وأخيرا وليس آخرا علمه أن السرقه حرام.. سرقة المال والنظر والعرض،علمه أن مد ايده أو لسانه على حاجة أو حد مش بتاعه حرام وقبح وندالة ووساخة ونجاسة.

تابع: “بعد ما نعمل ده ونتأكد من تربية عيالنا، تعالوا بقى كل واحد يعرف حد في مجلس الشعب نصعد الموضوع ونطلب بتغيير القوانين وتغليظها وتطبيقها.. .يلا نشارك الجمعيات الأهلية المهتمة التوعيه المجتمعيه.. يلا نرجع مصر الشهامة اللي كانت لحد السبعينات.. يلا نرجع أخلاق ولاد الحارة اللي ماكنش حد يستجري يعاكس بنت في حتتهم”.

أردف: “سنين واخدينا في منطقة قشرة التدين وظاهره بدون مضمونه وروحه، بدون الأخلاق والنتيجة كلنا عايشينها اهو. معرفش إذا كنت هعرف أنام تاني ولا لأ.. للي ما يعرفش الموضوع بالنسبالي مش شخصية عامة بتفتي، الموضوع بالنسبالي أب عنده بنت 15 سنة ومرعوب ومتنرفز من اللي شفته وسمعته انهارده بالذات. ربنا يحمي كل ولادنا ويبعد عنهم ولاد الحرام”.