عبد الله غلوش يكتب: غلوشيات رمضانية (8)
– اللي بيحصل بين نيللي كريم وظافر عابدين في “تحت السيطرة” وبين اياد نصار ومنة شلبي في “حارة اليهود” ابسط دليل علي صدق المقولة الشهيرة “العين فلقت الحجر”.
– وزير الأوقاق قطع ركعتي تحية المسجد اللي كان بيصليهم السيسي قبل خطبة الجمعة النهارده ، عشان يبوسه ويسلم عليه.
– “الطيب والشرير” علي ltc .. “البرئ والجرئ” علي cbc اكسترا .. نفس الفكرة ، نفس الاسئلة ونفس الضيوف تقريبا.
– اداء الطفلة رحمة خالد بطلة الأوليمبياد الخاص في الحملة الإعلانية لجمعية متحدي الاعاقة .. افضل من ممثلات كتير في مسلسلات السنة دي.
– اكبر مائدة افطار خيرية في العالم .. يا فرحة ما تمت.
– تتجلي بركة الداعية معز مسعود في الممثل الشاب محمد عادل اللي بيشارك في بطولة 5 مسلسلات السنة دي ، بعد ما شارك رمضان اللي فات في المشاهد التمثيلية لبرنامج “خطوات الشيطان”.
– خيمة رمضانا .. الاعلان الوحيد بصوت طارق نور حتي الان.
– رمضان اللي فات قناة المحور دراما عرضت المسلسلات من غير اعلانات والقناة قفلت بعده بشهرين نهائيا ، واضح إن سعيد حساسين عجبته الفكرة وعشان كده قرر يكررها السنة دي في قناة “العاصمة”.
– كلمات اغاني امير طعيمة .. اجمل ما في مسلسل لهفة.
– يعني ايه ترش ملح علي التورته .. يعني السيناريست أيمن سلامة يكتب مسلسل “غرام علي الانستجرام” في نفس السنة اللي عمل فيها مسلسل “مريم”.
– في الأسبوع الأول من رمضان ، 3 من أصدقائي واقاربي اتسرقت عربياتهم ساعة الفطار في التجمع الخامس.
– اللي يسمع حلقة من مسلسل هاني رمزي “هن السهن ” علي نجوم fm ، هيتأكد انه فعلا المصائب لا تأتي فرادي.
– الداخلية قبضت علي اللي خطفوا حفيد الغطاطي بتاع الكاوتش في 48 ساعة ، وبقالها 9 ايام مش عارفة تقبض علي اللي خطف ابن السقا.
– مصطفي حسني .. من الدعاة القليلين اللي تصدقهم.
– كنت فاكر ان احمد بدير بيجسد شخصية ممتاز القط في استاذ ورئيس قسم ، حلقة النهاردة خلتني اتأكد انه بيلعب دور سيد علي.
– مفيش فرق كبير بين اللي عملته اتصالات مع فودافون في اعلان العفريب ، وبين اللي بتعمله مستشفي “500 500″ مع مستشفي ” 57375″.
– بقالي 4 ايام بحاول اضحك علي أي مشهد في “الكبير” ومش عارف.
– س : اين يختفي جابر القرموطي في رمضان؟
– ربنا يرحمك يا أمي ويرحم امهاتنا جميعا ويخلي أمهاتكم يارب.