عبد الله غلوش يكتب: غلوشيات رمضانية (9)
– زي النهارده من 42 سنة كان يوم 27 يونيو 1973 علي فكرة.
– في يوم واحد ، جميلة عادل عوض ظهرت بمايوه في “تحت السيطرة” وسارة سلامة ظهرت بمايوه في “مولانا العاشق”.. ومش عايزين يحصل زلزال؟
– لأول مرة من فترة طويلة ، رمضان من غير أي مسلسل صعيدي.
– “حواري بوخارست” .. تاني أفضل عمل لأمير كرارة بعد “ستار ميكر”.
– في 6 حلقات مختلفة ، باك جراوند كل مشاهد هند رضا ورمزي لينر في “مريم” داخل الكافيه ، صوت تعليق رؤوف خليف من نهائي دوري ابطال أوروبا الأخير.
– ” 24قيراط ” .. المسلسل الأبطيء في رمضان.
– “لعلهم يفقهون” اللي بيقدمه الشيخ رمضان عبدالمعز وخالد الجندي يوميا علي الراديو 9090، من البرامج الدينية النادرة اللي تسمعها وانت مستمتع.
– بخلاف ملابس مذيعات النشرة اللبنانيات ، ما الذي تقدمه القاهرة والناس الان ليجعلها – كما تدعي – اجرأ قناة في رمضان؟
– حتي الان .. وزير الكهرباء يستحق التحية.
– في الحلقة العاشرة الظهور الاول لـ مي سليم في ولي العهد.
– سلوي محمد علي “حارة اليهود” .. لو واحدة ابنها خرج من البيت الصبح ورجع بالليل عادي ، مش اسرائيل واخداه أسير بقاله 9 حلقات ، كانت هاتستقبله بحرارة أكتر من كده.
– كمية السكر بودرة اللي الفنانين شموها في المسلسلات السنة دي غير طبيعي.
– 70% من اللي غيروا صور بروفايلاتهم لألوان الطيف ، مايعرفوش ان المقصود منها التضامن مع المثليين في أمريكا وفاهمين انها أوبشن أو appجديد ، اما الـ 30 % الباقيين فمن باب الرخامة.
– بيومي فؤاد “البنك الأهلي” و محمد هنيدي “توشيبا اندرويد” .. اجمد voice over في اعلانات رمضان.
– نفسي أشوف ريأكشنات مبارك وهو بيتفرج علي عادل امام في استاذ ورئيس قسم.
– رغم عرض مسلسله “الصعلوك” علي اكتر من 8 قنوات ، قليلين اللي يعرفوا ان خالد الصاوي عامل مسلسل السنة دي.
– الحاجة الوحيدة اللي خرجت منها بعد مشاهدة “حق ميت” ان ايمي سمير غانم لا تصلح في اداء الأدوار الكئيبة.
– س : هو الشباب المحترم اللي بيقف في الشوارع يوزع تمر ومولتو وقت الفطار ، بيروحوا فين بعد رمضان؟
– ربنا يرحمك يا أمي ويرحم امهاتنا جميعا ويخلي أمهاتكم يارب.
اقـرأ أيضـاً:
عبد الله غلوش يكتب: غلوشيات رمضانية (8)
عبد الله غلوش يكتب: غلوشيات رمضانية (7)
عبد الله غلوش يكتب: غلوشيات رمضانية (6)
عبد الله غلوش يكتب: غلوشيات رمضانية (5)
عبد الله غلوش يكتب: غلوشيات رمضانية (4)
عبد الله غلوش يكتب: غلوشيات رمضانية (3)
عبد الله غلوش يكتب: غلوشيات رمضانية (2)
عبد الله غلوش يكتب: غلوشيات رمضانية (1)
.