هبة العفيفي: إدمان.. الحاجات
القهوة إدمان زيها زي السجاير والموسيقى وريحه برفان الناس اللي بنحبهم.. الشاى بالنعناع ساعه العصاري أو وقت المغربيه إدمان زيه زى الأماكن اللي بنحب نروحها لأنها بتفكرنا بناس وحشنا نفتكرها..
الحب والعشق والكراهية إدمان .. الشغل إدمان والأصحاب إدمان
مش بس المخدرات هي اللى إدمان.. إدمان الحاجات بردوا ليه أعراض انسحاب ووجع.
نجاح مسلسل تحت السيطرة مش بس عشان هو بينقل شكل الإدمان وأعراضه والرجوع ليه والشفا منه بشكل أقرب للحقيقه عن كل اللي اتقدم في الدراما قبل كده …لا كمان عشان إدمان مشاعر معينه وأصحاب معينه ولمه معينه وبيوت معينه.
إدمان الحاجات أحيانا بيتساوى بإدمان أي نوع من المخدر
إدمان ممثل معين وأدائه وتفوقه بيخلي المشاهد يقتنع بيه وبأدائه مهما قدم عشان كده نجاح تحت السيطره ثقه في اللى هتقدمه نيللي كريم وباقي فريق العمل.
إحساس الشخصيه اللى بتقدمها نيللي قبل ما يظهر لنا على الشاشه أكيد كان إدمان الشخصيه هو اللى مسيطر عليها عشان كده ولا مرة هتحس أنها بتمثل إلا الحقيقه.
سلاسة الحوار اللي بيتقال بين كل الأدوار وقربها قوى من واقع كلامنا في الحقيقه سبب تاني من نجاح المسلسل ..
الاعتماد بردوا على قصص تانيه ووشوش تانيه خلا المشاهد يحس ان البطوله مش بأن الاسم اللى مبني عليه العمل الدرامي هو اللي لازم يبقى ليه أكتريه المشاهد.
الميزان واقف في النص بالظبط .. وازن بين البطلة وباقي الأبطال مدى فرص لوشوش كتير شاطره تقدم اللي عندها وتقدم إدمانها للشخصيه اللى وافقت تقدمها للجمهور.
الميزان واقف في النص بين اللى كتب واللى أخرج واللى عالج النص
المعادله بساطتها هو سر نجاحها.. ممثلين شاطرين + فكره موجودة في الحقيقة + حوار قريب من الحقيقة مع إخراج مركز مش بيقدم فيزيا للناس.. كل ده بيساوي عمل درامي قريب من الناس عشان كده نجح.