عبد الله غلوش يكتب: غلوشيات رمضانية (10)

28 يونية 2015 | 08:57 مساءً

– اوسطه مغفرة .

– الزمالك من غير باسم مرسي زي “استاذ ورئيس قسم” من غير محمد عبدالرحمن.

– يارب اشوف مجدي كامل بيضحك في مشهد واحد في “ذهاب وعودة” قبل ما رمضان يخلص.

– الحلقة 11 ، الظهور الأول ليسرا اللوزي في “تشيللو” .. الظهور الأول لأيتن عامر في العهد والظهور الأول لجميل راتب في “حارة اليهود”.

– سمير غانم .. ناقص له تكه و ويوصل لمرحلة الخليل الكوميدي.

– شيرين غلطت انها عملت “طريقي” وهاتغلط اكتر لو مجمعتش الأغاني الحلوة اللي غنتها في المسلسل ده ونزلتها في ألبوم.

– اكتر ناس بيتعبوا في رمضان ، مقدمي البرامج الصباحية علي الراديو ، واللي شغالين في برنامج الشيف حسن.

– مش حاسس بإختلاف كبير بين اسر ياسين في “العهد” واسر ياسين “الف ليلة وليلة”.

– هبة عبدالعزيز “خوشناف” .. الحسنة الوحيدة في الكبير5.

– بصراحة برنامج “مصارحة حرة” قطع الطريق علي أي حد فكر يعمل هارد توك شو حلو في رمضان وبصراحة اكتر ten غلطت لما عرضته قبل رمضان.

– حتي الان ، مش فاهم ايه المفصود باللايك علي status واحدة كاتبه ان ابنها عيان ومحجوز في المستشفي.

– ” أمنا رويحة الجنة ” .. من احلي المسلسلات الخليجية اللي ممكن تشوفها في حياتك.

– ربنا يكفيكم شر الصداع في الصيام.

– لو ماندو العدل جاب نتنياهو يعمل دور اليهودي القذر ، مش هايعمله بإتقان احمد حاتم.

– اجمل ما في اعلانات فيروز ” هي قالت ، هي تقصد ، هو سمع ” .. ان كل واحد بيتخيل نفسه فيه.

– عمرو يوسف .. الناس اتكلموا عن “موسي كوست” اكتر ما اتكلموا عن مسلسله “ظرف اسود”.

– اعصر علي نفسك لمونة واتفرج علي حلقة من مسلسل “أوراق التوت” وصدقني عمرك ما هاتكررها تاني أبدا.

– ربنا يرحمك يا أمي ويرحم امهاتنا جميعا ويخلي أمهاتكم يارب.