بسبب مذيع الشارع.. شاب يتعافى من الإدمان

روى مذيع الشارع أحمد رأفت واقعة حدثت منذ سنة خلال إحدى لقاءاته مع الشباب بالشارع، موضحا أنه تسبب في تعافي هذا الشاب من الإدمان.

نرشح لك: مذيع الشارع: “بحب غلاسة المواطنين”

نشر رأفت صورة من حواره مع الشاب على حسابه الشخصي عبر موقع التواصل الاجتماعي فيسبوك، وكتب تفاصيل الواقعة: “من سنة كنت بصور حلقة من حلقات مذيع الشارع وكنت بصور مع طالب كان بيفتخر أنه بيضرب مخدرات، بعد ما خلصنا تصوير والحلقة اتذاعت بعتلي ماسنجر واتكلمنا تليفون وكلمته عن أضرار القرف ده من باب النصح وقفلنا المكالمة وما اتكلمناش تاني”.

أردف: “امبارح يوسف كلمني وقالي أنه بطل مخدرات، الخبر علي قد ما خلاني مبسوط جدا بس فرحت أكتر لما قالي انت السبب الله يباركلك لأني تأثرت بكلامك، قلت في نفسي ده انا كنت بقول كلمتين والسلام، معقولة الكلام ده فرق معاه؟ طبعا احنا أسباب لكن ربنا بإيده كل شئ وكمان يوسف راجل وجدع وبطل وابن ناس عرف أنه غلط وداس علي نفسه علشان هي ديه الرجولة وهنا بتبان الإرادة الحقيقة”.

تابع مستطردا: “حاجات مهمة لازم ناخد بالنا منها أن الكلام اللي بنقوله للناس ميطلعش وخلاص لأنه ممكن يدمر إنسان وممكن يحيي إنسان، وكمان كل واحد مؤثر في اللي حواليه”.