مُختلق.. نجل إبراهيم أصلان يتحدث عن مشهد "الكيت كات" المنتشر
مرام شوقي
علق الصحفي هشام أصلان، على مقطع منتشر على صفحات الفيس بوك ينسبه البعض إلى والده الكاتب الراحل إبراهيم أصلان.
نرشح لك: في ذكرى ميلاده.. رسالة مؤثرة من محمد محمود عبد العزيز لوالده
كتب “أصلان”، منشوراً على حسابه عبر موقع التواصل الاجتماعي “فيسبوك”: “فيه مقطع لطيف منتشر بقاله فترة على فيسبوك باعتباره اقتباس من فيلم الكيت كات ورواية مالك الحزين، وجو شوف حكمة المؤلف والدروس المستفادة، وكل شوية صديق يمنشنني فيه من باب التذكير بالوالد والدعوات بالرحمة والحاجات اللطيفة اللي بتحصل أحيانا دي من أصدقاء ومحبين”
تابع: “الحقيقة إن المقطع مالهوش علاقة بالفيلم ولا بالرواية، وكنت الأول بعمل لايك وأقول يمكن فيه مشهد واقع من ذاكرتك عادي ما أنت مش المرجع، بس الحقيقة كقارئ ومشاهد يعني لا دي شبه كتابة إبراهيم أصلان ولا شبه سينما داود عبد السيد”.
واختتم حديثه كاتبًا: “أنا عادة مش بحب أتعامل باعتباري المتحدث الرسمي لإبراهيم أصلان، وياما كتاب منسوب لهم كلام مش بتاعهم، بس للأمانة ضميري صحي وحبيت أوضح ده مش عشان تصحيح الأمر، لكن عشان اللي هايمنشنني فيه بعد كده اعمل له قلب أحمر واسكت وأنا ضميري مرتاح، ألف شكر، ألف شكر، ألف شكر”.
فيما أوضح أن المقطع المنسوب: هو كالآتي:
– طيب إيه أحسن من الفلوس؟.. تقدر تفهمني يابا؟
– أحسن حاجة في الدنيا الناس الطيبين يا يوسف، وعشان كده لما هايخلصوا .. هاتخلص الدنيا
– طيب والطيبين دول ها يعوضوني عن الفلوس
ولا هاكل وأشرب وأتجوز بيهم؟
– اللي بيأكلك و يشربك و يجوزك هو رب الناس الطيبين.. خلى بالك من الطيبين وماتجيش عليهم
ولا تمشي في ديل اللي ييجىي عليهم هتلاقي ربنا معاك
و يكرمك
– الطيبين اللي أعرفهم كلهم غلابة.. عايزني أبقى في كفة الغلابة؟
– يابنى الدنيا بتتشقلب في يوم و ليلة والغلبان بيقوي والقوي بيهده اللي أقوى منه والمحبوس يبقى بره واللي بره يتحبس واللى فوق يقع على جدور رقبته اللي تحت يبقى فوق، ما يغركش البهرجة اللي حواليك، دي نفخة واحدة من السما تعدل المقلوب وتقلب المعدول، فوق يا يوسف.
الجدير بالذكرأن إبراهيم أصلان، كاتب وروائي مصري له العديد من الأعمال مثل عصافير النيل، حجرتان وصالة، وصديق قديم، ومالك الحزين التي حولت إلى فيلم يحمل اسم “الكيت كات”، من بطولة محمود عبد العزيز، وشريف منير.