عبد الله غلوش يكتب: غلوشيات رمضانية (14)

02 يوليو 2015 | 05:00 مساءً

– في حد أخد باله ، ان كلمات تتر “الكبير” مبقتش ملائمة لقصة وأحداث المسلسل بداية من الموسم الثالث؟

– جيهان فاضل لازم تسأل سمية الخشاب عن اسم الدكتور اللي خسسها.

– بين السرايات .. (صبري فواز – سيمون – نجلاء بدر) .. شابوه.

– اللي عمله جورج قرداحي في برنامج “المسامح كريم” ضيعه في اعلان بنك التعمير والإسكان.

– لما تبقي سوزان نجم الدين رمز للأنوثة في “وش تاني” ، ولقاء سويدان رمز للجمال في “استاذ ورئيس قسم” ، يبقي واضح ان احنا معندناش نظر فعلا.

– “تحت السيطرة” .. مشهد عودة نيللي كريم لظافر عابدين .. كورس في التمثيل.

– خالد امين مهندس ديكور الف ليلة وليلة .. يستحق التحية.

– طريقي .. اغنية ” كده ” .. واحده من احلي الاغاني في تاريخ شيرين.

– طريقي .. مشهد موت اخو شيرين الصغير الأفضل بين مشاهد المسلسل حتي الان.

– طريقي ..الـ 100 جنية اللي كان بيتنقط بيها اخو شيرين الكبير في فرحه النهارده ، مكنتش ظهرت في الفترة اللي بيحكي عنها المسلسل.

– طريقي .. ياسمين صبري “نادية” .. ملكة جمال الممثلات في رمضان السنة دي.

– الظاهر ان عبدالرحمن ابوزهرة عجبته فكرة الموديل الصامت في اعلان “اطياب” فقرر يكرر التجربة مرة تانية في اعلان ” كوفرتينا”.

– ” مريم” .. اعتقد ان المسلسل هايكون السبب في اعتزال محمد كيلاني للغناء وتفرغه للتمثيل.

– كريم محمود عبدالعزيز .. من الحسنات القليلة في “الكابوس”.

– حارة اليهود .. اعرف ان المخرج ممكن يعيد نص دقيقة من حلقة امبارح في حلقة النهارده ، بالكتير اوي دقيقة ، لكن اعيد 7 دقائق كامله .. جديدة دي.

– حارة اليهود .. مشهد موت حسن البنا اتعمل بلدي اوي.

– حارة اليهود”.. اياد نصار عايش في دور شكري سرحان بشكل مبالغ فيه.

– في مول HUB سوديك .. بيذيعوا اغاني فيروز بدل اذان المغرب.

– ” مولانا العاشق” .. اجمد مسلسلات مصطفي شعبان بعد العار.

– ” Rating رمضان”.. افضل حلقات البرنامج مش عشان ضيفتها هيفاء ولكن عشان وسام بريدي كان بيقدمها لوحده.

– ” اولاد رزق” .. أخشي ان تخسر أصالة رهانها علي أبو عزالدين وزين الدين.

– في اليوم اللي حمادة هلال “ولي العهد” اتجوز مي سليم علي هبة مجدي عشان يخلف ، باسم سمرة “بين السرايات” اتجوز نسرين امين علي روجينا ، لنفس السبب.

– كلاكيت تاني مرة .. منة فضالي “وش تاني” .. مثال حي للأفورة في التمثيل.

– كمية الكحك اللي نزلت فجأة في السوبر ماركت ومحلات الحلويات ، تكفي احتياجات مصر لصناعة أول قنبلة نووية.

– “لعبة ابليس” .. مسلسل هايل بس نصيحتي الوحيدة ليوسف الشريف ، يحاول يبتكر ويقلل شوية من مشاهده المقتبسة من الافلام الأجنبية.

– الأسوأ من اعلان قطونيل حسن حسني ، اعلان قطونيل هالة فاخر.

– محمد الشرنوبي سواء في العهد أو بين السرايات .. واحد من افضل الوجوه الصاعدة في رمضان.

– ” ذهاب وعودة ” .. ممكن تسيب المسلسل 3 او 4 حلقات وبعد كده ترجع تتفرج عليه وهاتحس ان مفيش حاجة فاتتك.

– لو كل واحدة بعد الحمل والولادة هاتبقي في حلاوة يسرا اللوزي في “تشيللو” كده ، مفيش حد هايتجوز علي مراته.

– لدواع السفر والشغل والعبادة ، اشوفكم علي خير اخر رمضان ان شاء الله.

– ربنا يرحمك يا أمي ويرحم امهاتنا جميعا ويخلي امهاتكم يارب.