هيثم التابعي: المسايرة في الغلط مش حب يا بنات
بنات كتير مبسوطة ومبهورة بقصة هانيا وعلي في مسلسل تحت السيطرة لنيللي كريم.
شايفينها قصة قمة في الرومانسية والاحتواء، قمة في تحقيق السعادة والانبساط.
علي الشاب الفاسد التالف مفتول العضلات اللي كان معاه فلوس كتير مبيعملش بيها غير انه بيضرب مخدرات حب هانيا بنت الناس الكويسين ام اكسنت حلو في الانجليزي واللي عندها 16 سنة وفخورة انها بتحب تجيب A في المذاكرة والحشيش والسكس.
صاحبنا علي، لمن لا يتابع المسلسل، حب هانيا وضمها لشلته الفاسدة المدمنة.
هانيا دخلت دايرة الغلط وبدات تضرب مخدرات، ولان علي “بيحب” هانيا ومخلص لحبهم دة فهو ما ممانعش او نقول وافق بعد تردد انها تضرب هي كمان.
ولسبب غير مبرر ومفهوم في دواير عالم المدمنين، فان علي مستندلش مع هانيا ومتمسك بيها ومش بيسيبها رغم ان احواله المادية تراجعت بشكل مريب انا بصراحة وقع مني حلقتين تلاتة من المسلسل ورجعت لقيته مش لاقي فلوس يضرب، هانيا هنا قالتله الكلمة التاريخية نفكر ليه في مستقبلنا لما لا معانا فلوس نسكور بيها… نبدا نفكر لما فلوسنا تخلص. اه والله قالتله كدة.
علي بيحب هانيا ومشجعها على الغلط والفساد. الغلط في حق نفسها وفي حق اهلها وفي حق مستقبلها.
علي بيبوس هانيا على دماغها وبيحضنها ومديها رومانسية اعملي اللي انتي عايزاه يا حبيبتي.. انا بحبك وعايز اشوفك مبسوطة ومدمنة قد الدنيا.
هانيا، او حبيبي كما يدللها علي، واللي انتوا شايفنيها رمز للاحتواء… دي رمز للفساد المطلق.. بنت 16 سنة مدمنة مخدرات وحامل هي لسا قاصر ومستقبلها اتدمر.
نصيحة لكل بنت، اللي هيسيارك على غلط دة بيفسدك، لا بيحبك ولا بيعزك ولا عايز مصلحتك.
الحب الحقيقي هو ان واحد يصلح طريقك لما تغلطي او يبعدك اصلا عن الغلط.
الحب ان واحد يخليكي افضل وانجح واكثر احتراما لنفسك وللناس من حواليكي، مش يخسف بيكي الارض.
علي مش بيحب هانيا. علي مبسوط انه معاه شريك في فساده وغلطه، شريك بيخليه دايما فاهم ومدرك انه “مش غلطان لوحده..فيه غيره ناس غلطانه وبيحبوه وهو غلطان”
علي لو بيحبها صحيح مكانش دخلها في دايرة الفساد والضياع دي ابدا.
ساعات اللي انت شايفه حب ودلع هو اكتر حاجة بتقتلك. المشكلة انك لما هتكتشفي دة هيكون الوقت متاخر اوي، اوي اوي الحقيقة.
الحب الحقيقي في ام قوية عادلة تقول لبنتها عيب وغلط .. تقول لبنتها انتي خرجتي عن المالوف والادب والاخلاق وتعاقبها بحزم.. ام واب يقوموا… بس للاسف ابوا هانيا تقريبا كان في مشوار في الخليج بيبني مستقبله وبيهدم مستقبل بنته… اه الاتنين سوا.
الغلط بيلط الكل… مش هتروحي لشلة مدمنين وتحبي واحد مدمن وتفضلي تجيبي A في المذاكرة.. هتجيها في الحشيش بس يا حبيبتي.
أنا دايما أعز اصحابي اللي بيصحوني ويوروني غلطي… محبش ابدا الطبال اللي مطلعني ملاك ومنزه عن الخطا…. اللي بيؤيدني في غلطي ويبررهولي وويسايرني فيه.
هانيا مستقبل فروا منه مش حاضر تعيشوا فيه.