قبل عرض "ما وراء الطبيعة".. نجل أحمد خالد توفيق يوضح موقفه من التعديلات

دنيا شمعة

قال محمد نجل الكاتب الراحل أحمد خالد توفيق، إنه شاهد المسلسل كاملًا قبل عرضه على منصة “نيتفلكس”، وأعجب به بشدة.

تابع “محمد” عبر منشور على صفحته الشخصية على موقع التواصل الإجتماعي “فيسبوك”: “أنا بقالي فترة يمكن أكون ساكت وبتفرج وبراقب كل ردود الفعل المتعلقة بمسلسل ما وراء الطبيعة اللي نازل إن شاء الله الخميس 5 نوڤمبر 10 صباحا، وفي حبة نقاط كدة أحب أني أقولها وتكون في الحسبان وأنت بتتفرج”.

نرشح لك: بمكتبة “شراع”.. كواليس تصوير وثائقي “ما وراء الطبيعة”

تابع: “أولاً المسلسل ده هايكون أول عمل مصري أصلي على منصة نيتفلكس العالمية، ودي خطوة عظيمة جدًا للصناعة وجايز تكون الخطوة اللي هتفتح الباب لأعمال تانية كتير سواء على منصة نيتفلكس أو على منصات عالمية”.

أضاف: “ثانيًا.. المسلسل ده هو حلم والدي رحمة الله عليه اللي حاول يحققه من 2006.. الحلم اللي كان دايمًا بيقف لأسباب متعلقة بمشاكل إنتاجية وعقبات متتالية لحد وصل المسلسل لأفضل مكان يقدر ينتجه ويطلع بالصورة اللائقة التي تليق بمسلسل (ما وراء الطبيعة)”.

أردف: “متفهم غيرة القراء على الروايات والدفاع الشرس ضد أي تغيير في اللي قروه وحبوه مهما كان صغر التعديل ده.. ده دفاع ناجم عن حب القراء لكاتبهم المفضل اللي شكّل تفكيرهم وطفولتهم وبطلهم اللي كان صديقهم المقرب لسنوات طويلة من حياتهم.. لكن كلمة والدي دايمًا كانت إن لكل وسيط ظروفه الخاصة وطريقة مختلفة لتقديم العمل فيه.. هاتكون فرصة نشوف حاجة جديدة من نفس العالم اللي حبيناه واتربينا فيه”.

استكمل: “افتكروا دايمًا إن اللي بيقدموا المسلسل هم اتنين من أقدم أصدقاء والدي المقربين وقراء بيعشقوا الروايات زينا كلنا.. هم تحملوا مسؤولية عملاقة وبذلوا مجهود غير طبيعي عشان يقدموا الروايات دي للقراء ولشريحة أكبر من المشاهدين في نفس الوقت”.

كما أوضح أنه من حق كاتب السيناريو والمخرج أن يضعوا رؤيتهم في العمل، معلقًا: “وده لا ينتقص نهائيًا من قيمة الروايات بل على العكس.. وحتى الخيط اللي بيربط بين الحلقات هو خيط من الروايات نفسها وهتشوفوا إن الكل اجتهد عشان يحافظ على روح الروايات لكن مع إضافة تفاصيل ومفاجآت تمتع حتى اللي قروا الكتب قبل كده”.

كما طالب الجمهور بعدم الانسياق وراء النسخ المقرصنة من المسلسل، حتى يحقق نسب المشاهدة المتوقعة، ويستطيعوا إنتاج العديد من المواسم الجديدة منه.

اختتم: “أرجو إن نزول المسلسل يكون فرصة تفتكروا فيها والدي رحمة الله عليه وتدعوا له بالرحمة.. يا رب يكون مبسوط حاليا و فخور بأولاده .. ويا رب يقدرنا نشرّف اسمه على طول”.