أمير عيد يعتذر بسبب حفلة كايروكي
علق المطرب أمير عيد وعضو فريق “كايروكى”، على الانتقادات الموجهة لهم بسبب إقامة حفلة، اليوم، في ظل تسارع وتيرة الإصابات بفيروس كورونا، مؤكدًا أنه قد يكون اخطأ في اختيار التوقيت،وقال “أمير” في منشور له على موقع التواصل الاجتماعي “فيس بوك”، “قبل قيام الحفل النهاردة احب اقول أن انا ممكن اكون غلطان ومقرأتش الامور بالشكل السليم من الاول، خصوصا ان وقت الاتفاق عن الحفل كانت الظروف مختلفة والامور مستقرة اكثر من دلوقتي وبيتعمل حفلات”.
وأضاف: “اي حد عنده الحق يعترض علي إقامه حفل كايروكي مش هصادر رأيكم، الموضوع نسبي، هناك من يؤيد استمرار الحياة مع الوقاية عشان الشغل والحال يمشي وهناك من يؤيد العكس”.
نرشح لك: أمير عيد يعتذر للجمهور بسبب لفظ “بنات شمال”
إلا أنه أكد أن قرار الإلغاء أو التأجيل كان من أصعب ما يكون بعد بيع التذاكر من اول يوم نزلت فيه، حسب قوله.
وتابع” المشكلة الاكبر ان في ناس اشترت تذاكر سوق سوده بأسعار كبيرة ودول مش هيعرفوا يرجعوها او ياخدوا فلوسهم تاني وغير الناس الكتير اللي بتشتغل ورا الحفله والتعاقدات والخ الخ”.
وأردف: “ده قرار مش هعرف اعمله لوحدي لاسباب كتير ومعقدة، مش هخوض فيها، وكل اللي قادر اعمله اني انبه علي الجميع واكون امين معاهم واني اتابع بقدر المستطاع مع منظمي الحفل ضرورة تنفيذ خطتهم الوقائية الموضوعة”.
وتضم هذه الإجراءات بحسب ما قالها عضو “كاريوكي” ، قياس درجات الحرارة للحضور قبل الدخول والتأكد من ارتداء الكمامة، وضمان وجود عدد كبير من المراقبين داخل الحفل للتأكد من ان كل حد بيتبع الإجراءات الوقائية، واستيعاب عدد اقل من الحضور لضمان التباعد قدر الإمكان، مع مراجعة خطه الحفل مع الجهات المعنية ليتم كل شيء بشكل سليم.
واختتم قائلا: ” طبعا كل ده ملوش قيمه بدون التزامنا كلنا و كل شخص يكون مسئول عشان نفسه وعشان الناس اللي حواليا انا بحاول اعمل كل اللي اقدر عليه في الوضع الحالي اللي لقيت نفسي فيه وبحاول اكون امين معاكم في نقل الصوره ويهمني سلامتكم اكتر من اي حاجه تانيه. وبعتذر لو كنت اسأت التقدير”.
كان فريق كايروكى قد أعاد تقديم أغنيتهم الشهيرة “غمض عينك” على شكل فيديو كليب مصور ، بعد 5 سنوات من طرحها.
”غمض عينك” واحدة من أشهر وأقدم أغنيات كايروكى التى ظهرت لأول مرة ضمن ألبومها الثالث “ناس وناس” منذ خمس سنوات مضت، أعادتها الفرقة مؤخرا بتقديم نسخة “ريميكس” منها ضمن حفلتها الأونلاين الأولى التى حملت عنوان “كايروكى من الاستوديو”، وجاءت وسط أزمة الحجر الصحى والتباعد الاجتماعى التى فرضها فيروس كورونا.