اتهموها بفقدان المصداقية.. رد دعاء فاروق على المنتقدين

ردت الإعلامية دعاء فاروق، على من اتهموها بفقدان المصداقية، نتيجة الحملات الدعائية التي انشغلت فيها مؤخرًا.

نشرت “فاروق” عبر صفحتها الرسمية على موقع “فيسبوك” منشورًا كتب فيه: “عاوزة أقول حاجة بمنتهى الإخلاص والأمانة لكل الناس اللي بتقول من ساعة ما اشتغلتي في المعارض والدعاية لمنتجات فقدتي مصداقيتك على الشاشة”.

نرشح لك:رد فعل زوجة أحمد فتحي على رحيله من الأهلي

تابعت: “بحمد ربنا حمدا كثيرا مباركا ان سبحانه وتعالى جعلني سبب لفتح باب رزق لستات شقيانة بتصحي من الفجر تنزل تسعى وتشقي وتفرش بضاعتها مرة في أكتوبر ومرة في التجمع ومرة في المنصورة.. ليه بقي ؟ عشان ايه؟ ايه اللي جابرهم؟ هل مثلا بينزلوا في عز الكورونا ويغامروا بصحتهم ونفسهم عشان يتفسحوا؟ ولا عشان يكسبوا بالحلال ويفتحوا بيوتهم ويجوزوا عيالهم؟”.

أضافت: “أنا بقي ربنا حطني في المكان ده انا وكل منظمين المعارض ربنا يبارك لهم ويوسع رزقهم ربنا استخدمني معاهم عشان الناس دى تشتغل وربنا يوسع رزقهم، أنا بشتغل في النور وبعمل أقصي ما في وسعي عشان أخليهم يبيعوا ويكسبوا بإذن واحد أحد.. آه اعمل لهم كرنفالات وشقلاباظات عشان الناس تيجي وتشوف بضاعتهم، لما يبقى عندي ستات بيوت كل بضاعتهم أكل بيتي بتشتغل من قلب بيتها بالحلال سهرانة طول الليل منامتش بتعمل اكل وتغلف وترتب هتصحي تنزل الفجر عشان تفرش أكلها عشان تساعد وعشان متمدش ايديها لحد ولا تتحوج لمخلوق، وأمنية حياتها تلاقي مكان محترم تعرض فيه اكلها وربنا يجعلني سبب إني افتح لها مكان”.

أردفت: “دي نعمة كبيرة قوي ربنا أنعم عليا بيها، عارفة حضرتك إن فيه ناس بيكلموني يوميا نفسهم يدخلوا يعرضوا عندى والأماكن خلصت وفيه منهم بتعيط بالدموع، بتعيط ليه يا تري؟ عشان نفسها تشتغل ومش لاقيه سكة تتفتح لها، ادعولنا اننا نكمل ونساعد الناس دى تكسب بالحلال، ومصداقيتي على الأرض ومع الناس مش على الشاشة، مصداقيتي ونيتي ربنا هو اللي يحددها مش اي حد بينظر من بعيد وميعرفش ظروف الناس ايه؟، ادعولنا وادعوا لكل الستات انها تكسب النهاردة.. اللهم بارك اللهم بارك اللهم بارك”.