سيد على عن واقعة "فتاة سقارة": "إذا كنتوا عايزين الناس تتحجب عند الآثار قولوا لنا"

هدير عبد المنعم

علق الإعلامي سيد علي، على واقعة جلسة تصوير عارضة الأزياء سلمى الشيمي، وهي بالملابس الفرعونية في منطقة سقارة، التي أثارت جدل كبير على مواقع التواصل الاجتماعي.

تساءل: “الهيصة اللي اتعملت على السوشيال ميديا والدنيا المقلوبة دي كلها.. هل تستحق؟ وفعلا السوشيال ميديا هو اللي بيدفع المسئولين تحت ضغطه لاتخاذ القرار؟ دي مسألة خطيرة جدا”.

نرشح لك: أثار جدلا كبيرا.. القصة الكاملة لـ فوتوسيشن سيدة سقارة

تابع “علي” خلال برنامج “حضرة المواطن” المذاع على شاشة “الحدث اليوم”، أنه لا بد أن يكون هناك منطق وقدر من الموضوعية والثقة بالنفس، وعدم اتخاذ قرارات تحت ضغط مواقع التواصل الاجتماعي.

تابع: “الناس اللي جاية دول الأجانب اللي موجودين في وادي الملوك والأقصر والهرم واللي لابسة ميكروجيب واتصورت، هل ده غلط؟”.

استكمل أنه ذهب كثيرا إلى الهرم وشاهد أجانب لهم عاداتهم وتقاليدهم، قائلا: “ولا كنا بنبص، ولابسين أقصر من كده ومفتح اكتر من كده، بعدين ايه حكاية هذا التنمر الجنسي اللي بقى موجود؟ يعني لو حتة بانت من جسم الست الدنيا تقوم ولا تقعد”.

تابع: “إذا كنتوا عايزين عند الآثار الناس تتحجب قولوا لنا، إحنا بنتحجب لما ندخل المسجد مثلا لما نقابل شيخ الأزهر، إنما مش معقول عند الهرم وعند الأماكن دي كلها أي سيدة هتروح هناك تتحجب، وأنا لا أتكلم في الحجاب والعري بس أنا مش عايز ابقى واحد من ضمن اللي بينساقوا تحت ضغط السوشيال ميديا وابقى إمعة واطلع أقول اللي هما بيقولوه”.
أكد أن الدولة لا بد أن يكون لديها ثقة بنفسها وأن تكون قوية ولا تتأثر بضغط مواقع التواصل الاجتماعي.

واستعرض صورة للفنانة سامية جمال ببدلة رقص أمام أبو الهول، وقال: “دي سامية جمال، لو الصورة دي اتعملت دلوقتي كان إيه اللي حصل؟”، مضيفا: “هو يكونش الآثار بتاعتنا أبو الهول والهرم وسقارة أماكن مقدسة بنروح نصلي عندها مثلا ولا نحج ليها؟”.

يذكر أن الأجهزة الأمنية ألقت القبض على “حسام أورتيجا”، مصور الفوتوسيشن الخاص بعارضة الأزياء سلمى الشيمي، وذلك على خلفية جلسة التصوير التي ظهرت فيها “الشيمي” بملابس فرعونية في منطقة سقارة الأثرية، وأثارت غضب البعض ووصفوها بأنها غير لائقة.