توضيح من أندرو محسن بخصوص أزمة التذاكر في مهرجان القاهرة
حرص الناقد أندرو محسن، على توضيح بعض النقاط الهامة الخاصة بأزمة نقص تذاكر الأفلام في مهرجان القاهرة السينمائي الدولي في دورته الـ 42 هذا العام.
وقال أندرو، من خلال حسابه الرسمي على “الفيسبوك”: توضيح أخير لموضوع التذاكر – مدرك تمامًا لمشاكل التذاكر اللي حاصلة السنة دي، حاولنا نلاقي حلول لبعض المشاكل بدري، زي توفير شبابيك زيادة للصحافة، وإننا نعمل طوابير انتظار لدخول بعض الأفلام، بعض الأمور نجحت وبعضها لم ينفذ بالشكل المطلوب وبالتالي فضلت المشاكل موجوده وفضلت لافتة Sold Out مسيطرة على أفلام كتير.
نرشح لك: قبل دقائق من عرض فيلمه بمهرجان القاهرة.. رسالة أمير المصري للجمهور
أوضح محسن كيفية حجز التذاكر في المهرجان، قائلًا: “فيه نسبة ثابتة ومحددة للتذاكر مخصصة للكارنيهات، ونسبة أخرى للجمهور، وبالتالي ممكن يبقى الفيلم خلص بالنسبة لنسبة الصحافة، لكن نسبة الجمهور موجوده، وده اللي بيخلي أحيانا بعض الأفلام يبقى فيها كراسي فاضية، الحلول لده اقترحناها، وحاولنا تفيذها بإننا نزود نسبة الصحافة قبل العرض بمدة بما إن فيه إقبال من الصحافة ولسه فيه تذاكر، أحيانًا كانت الناس بتلاقي تذاكر إضافية قبل العرض نتيجة الحل ده.”
تابع: “بالنسبة لتذاكر الجمهور، فالحجز بيبقى مفتوح لكل الأفلام من أول يوم عكس البادجات اللي الحجز فيها بيكون لنفس اليوم واليوم التالي فقط، حد ممكن يشوف إن ده مش عدل، ممكن يكون مش عدل لو تذاكر الجمهور أخدت من تذاكر الصحفيين، بس النسبة بتفضل مقفولة، وبالتالي حجز الجمهور المفتوح لكل أيام المهرجان مش هيأثر عليها”، مؤكدًا أن ذلك يتم في كتير من المهرجانات في الخارج.
أشار إلى وجود نسبة من التذاكر مخصصة للطوارئ أو الدعوات الخاصة، مثل السفارات أو أعضاء لجان التحكيم أو بعض ضيوف المهرجان، وأن هذه النسبة كان أحيانًا يتم أخذ تذاكر للصحافة منها حينما تكون متوفرة.
أضاف: “أنا سمعت للاقتراحات من أغلب الأصدقاء ولازم أوضح الحلول دي أغلبها فكرنا فيه ونفذنا بعضها وفيه كتير منه غير قابل للتنفيذ” .
واصل: “مش قادر أفهم تمامًا الناس اللي بتهاجمني شخصيًا عشان مقدرتش أوفر تذاكر، والموضوع بيوصل لاتهامات إني وزعتها على أصدقائي أو لناس بعينها، أنا مش دوري على الإطلاق إني أوفر تذاكر، وحاولت قدر الإمكان بشكل شخصي ألاقي تذاكر في الطوارئ اديتها لبعض الصحفيين اللي طلبوا مني بأسبقية الطلب، أو أدخل بعض الناس بدون تذاكر في حالة إن القاعة تسمح”.
واختتم: “لازم أشكر كل الناس اللي علقت بشكل موضوعي سلبًا وإيجابًا على ذوقهم وملاحظاتهم وآسف على أي خطأ حصل أكيد غير مقصود، دوري الأساسي يتعلق بالبرمجة واختيار الأفلام، وكنت أتمنى أعرف الآراء عن الموضوع ده تحديدًا بعيدًا عن مشاكل التذاكر”.
