طارق الشيخ لـ منتقدي أغنية "القاضية ممكن": أنا أسف

هدير عبد المنعم

علق الفنان طارق الشيخ، على الانتقادات التي تعرض لها بعد غنائه أغنية “القاضية ممكن” التي تسخر من خسارة نادي الزمالك لبطولتي دوري أبطال أفريقيا وكأس مصر، وذلك خلال برنامج “الدوبلكس” لأبلة فاهيتا، وقال: “أنا راجل زملكاوي جدا، والحكاية كلها أن البرنامج ساخر واحنا بنعمل الأغاني وعكسها، فلما جم اتكلموا عن الزمالك، قلت لهم أنا زملكاوي، فأنا مش هينفع أغني دي حتى إحنا عيدنا كذا مرة”.

تابع “الشيخ” خلال مداخلة هاتفية مع برنامج “الحكاية” المذاع على شاشة “mbc مصر” ويقدمه الإعلامي عمرو أديب، أنهم أخبروه أن تلك الأغنية مكتوبة من أجل “لا للتعصب”، مضيفا: “قالوا لي مكتوب فيها اهو زقططنا قوي بجون شيكا جون عالمي جون مزيكا، فالمقصد مش إني قاصد جمهور الزمالك ولا لاعيبة الزمالك، المقصد إن احنا عمالين نقول مفيش تعصب”.

نرشح لك: طارق الشيخ يعتذر عن غناء “القاضية ممكن”

وعن ردود الأفعال بعد إذاعة الأغنية، ذكر: “نازل عليا سيل من اللي أنت عارفه بقى، إنما والله العظيم الموضوع بنتكلم في حاجة تانية خالص، وفيه اتهامات إني خاين وعميل والجو ده، والمقصود مش كده، المقصود أن مش معنى أن أنا خسرت حاجة إني أخسر كل حاجة، وأنا واحد من مشجعين نادي الزمالك وإذا كان الموضوع أتفهم بإساءة ظن فأنا أسف لكل من ينتمي لنادي الزمالك، كل المشجعين والإداريين والمسؤولين عن نادي الزمالك”.

أشار إلى أنه تفاجئ مما حدث، ووجد على صفحته حوالي 200 ألف شخص يقومون بسبه، مضيفا: “أنا عارف أن إحنا كجمهور الزمالك كتير قوي، والأيام اللي فاتت بسم الله ما شاء الله كترنا، بس أنا بقولك مش معنى أن أنا خسرت بطولة أخسر وراها كل البطولات”

وعن تعرض أحمد حسام ميدو لاعب الزمالك السابق للانتقاد بسبب صورة له مع محمود الخطيب رئيس النادي الأهلي، قال: “مين مجنون ميشوفش الكابتن محمود الخطيب ويجري يتصور معاه، ومين من مشجعي النادي الأهلي ميشوفش ميدو أو الكابتن حسن شحاتة ويجري يتصور معاه، إحنا بقالنا شهر بنقول التعصب، وفي الآخر لما ننزل أغنية كأنها ماسورة تعصب واتفتحت تاني”.