عمرو حسن يعلن اعتزاله الفني بسبب إصابة في الرقبة

أعلن الشاعر الغنائي عمرو حسن، اعتزاله المجال الفني بسبب معاناته من أزمة صحية كبيرة.

وأوضح “حسن” عبر حسابه الشخصي على موقع “فيس بوك” تفاصيل هذه الأزمة، وكتب الآتي: “الرحلة انتهت.. بعد طول تفكير وبكامل إرادتي وبسبب ظروف صحية دامت لأكتر من سنتين دون الإفصاح عنها واستمر معاها عدم قدرتي على الوقوف على رجلي والالتزام بجلوسي على كرسي من أكتر من سنة وانتهت بسقوطي على مسرح ساقية الصاوي نهار الجمعه اللي فاتت وعدم قدرتي على إكمال الحفل”.

نرشح لك: إصابة عمرو مصطفى بفيروس كورونا

تابع: “أنا عندي مشكلة صحية كبيرة ف رقبتي واشتباه في ورم وبحة في حنجرتي بتوصل لعدم قدرتي على الكلام بعد كل حفلة لمدة يوم وأحياناً اتنين وتغيّر في نبرة صوتي غير اعتمادي على كميات كبيرة من المسكنات بسبب آلام عضلية مزمنة بتوصل بيا للصراخ في أوقات كتيرة غير آلام التهاب المريء المزمنة واللي معايا من أكتر من 12 سنة وكنت بسببها قبل حفلاتي وبعدها مبخرجش من الحمام كاتم الألم والالتهاب اللي بياكل فم معدتي
النهاردة”.

أردف: “في حفلتي في مدينتي الإسكندرية قعدت على كرسي وخدت برشام عشان الآلام الشديدة واتحملت مالا يتحمله بشر عشان أنهي الحفل بسلام لأني حبيت اني زي ما بدأت هنا أنهي هنا، أنا مريض بمشاكل نفسية عارفها ومتعايش معاها على رأسها الاكتئاب المزمن اللي معايا من سنين بسبب بعض التجارب المرضية المؤسفة واترددت كتير قبل ما أعلن في اللحظة دي رغبتي في التوقف تماماً”.

استكمل: “أنا دخلي كله من الحفلات اللي كنت لسنين طويلة نمرة واحد فيها ومعرفش ممكن أعيش إزاي بس أنا عندي خبرات كويسة في الإدارة والتسويق وأقدر لو اتعرض عليا شغل كويس إني أشرّف اللي هيختارني بس يكون شرطي الوحيد عدم وجود مجهود بدني وإني أشتغل وأنا قاعد، وبشكُر كل العاملين معايا في الحقل الفني من عشر سنين من موسيقيين ومعدين ومديري أعمال وفنيين ومنظمين، وبشكر صحابي أحمد شبكة ومي سعيد وسارة المهدي وهالة عبد الوهاب وأنس البغدادي”.

اختتم: “الخميس الجاي عندي حفل أخير (لا مجال هنا للإعلان عنه) لالتزامي بعقد وبعدها يكون انتهى كل شيء، بشكُر اللي صدقوني وقت ما بعض أصحابي ذمّوني وخانوا ملحي، بشكُر الناس اللي حبوني وعلّوني وحاوطوني بحبهم وفتحوا بيتي وقت ماكانش عندي بيت، وبشكر اللي قالوا إني محترم وجدع وقلبي نقي وراهنوا على طهارتي وقت ما اللي عاشرتهم بكل مشاعري ما قالوا فيه وفيه وبطلب من أي شخص زعلته يسامحني وبطلب منكم الدعاء بالفرج وزوال الغم والنجاة من المرض والشفاء بقدرة ربنا والدعاء بإني ألاقي الشيء الوحيد اللي ماعرفتش ألاقيه بالشعر والفن وهو (نَفسي)”.