12 درسًا تعلمهم أحمد أمين في 2020
شارك الفنان أحمد أمين متابعيه ما تعلمه من دروس خلال عام 2020.
نرشح لك: بعد إشادة منى الشاذلي بالدوبلير.. أحمد أمين يشكر “كازومي”
نشر “أمين” عبر حسابه الشخصي على موقع التدوينات القصيرة تويتر، وكتب: “اتعلمت من 2020 فيه دروس بتكون بديهية جدا ومليون شخص نصحك بيها، بس لما بتتحط في موقف مؤثر في حياتك بتتعلم الدرس ده بطريقة أوضح وأقوى، فأنا قررت في 2020 إن كل ما اتعلم حاجة من موقف اكتبها، المهم حاولت ألخصها فمن الآخر كده أنا اتعلمت في ٢٠٢٠ الآتي:
1- إن الأحلام اللي بترسمها لو أنت مصدق فيها يبقى هاتتحقق، حتى لو كانت وقت ما بترسمها تبدو هبل أو خيال.
2- إن الكرم وحب الخير للآخرين بيعمل لك مكانة خاصة عند الناس وبيصنع لك غلاف حماية من المشاكل ما تعرفش جاي منين، حاجة إلهية كده.
3- إن الواحد مش هيستفيد أي حاجة لما يبقى مهموم بالشغل لدرجة الحزن أو الاكتئاب بدعوى إني شخص مسؤول وبحب شغلي، بالعكس لو بتحب شغلك خليك بشوش واستقبل كل تفصيلة في المشروع بإيجابية وعامل كل الأطراف على إننا في مركب واحدة، وده نتيجته طلعت مبهرة.
4- إن الواحد مش مسؤول عن نتايج الشغل، يعني النجاح والفشل فعلا مش بإيدينا، اللي بإيدينا الاجتهاد والمحاولة، وده برضه مريح نفسيا إن بعد كل تجربة تراجع نفسك، عملت اللي عليك، لو أيوة يبقى كمل في اللي بعده وطنش النتايج.
5- إن أي فريق لو فيه شخص واحد بيصدر طاقة سلبية يبقى لازم يمشي من الفريق حتى لو كان هو أشطر واحد وهداف الفريق وعبقري زمانه، الشغل مع ناس إيجابيين وبشوشين هيطلع نتايج من الفريق كله أعظم بكتير من جو الشكوى والبكا أو الإحباط والسلبية.
6- إن الواحد لو اختار فريق كويس يشتغل معاه ببساطة هيركز في شغله أكتر فهايظهر في أحسن حالاته بمجهود طبيعي منغير حرق على المكنة.
7- إن الترفع عن المطالبة بصغائر المكاسب يفتح لك أبوابا من الخير لم تكن تحلم أن تطلبها.
8- إن التواصل والتوثيق الكتابي في أدق التفاصيل يقلل من كم ونوعية المشاكل التي تواجه أي مشروع.
9- إن مراجعة النيات والمقاصد والأهداف قبل أي قرار أو خطوة يهون عليك مرارة الندم، وبالبلدي بينور لك طريقك.
10- إن الانصياع عاطفيا وراء شكاوى الناس يصيبك بالغم والبطالة، الناس تعشق الشكوى، وعليك أن تظهر لهم دوما أنك منشغلا بحالك، اهرب بلباقة، ولا تترك نفسك فريسة لأمراضهم.
11- إن التطور مش إنك تموت نفسك ولا تتفرم في العمل الشاق، التطور ببساطة هو الاستمرار رغم الفشل، إنك تقدر ترجع.
12- إن كتابة المذكرات يوميا أحد وسائل الاتزان النفسي، واختراع عبقري هتكلم عنه كتير بعدين لأنه كان من أسباب تغير حياتي فعلا.
وفي النهاية يارب تكون السنة اللي جاية أحلى من اللي فاتت، ولو حد عنده درس خده السنة دي ياريت يقوله ونستفيد، وكل سنة وأنتم طيبين، النهاية”.
اتعلمت من ٢٠٢٠
فيه دروس بتكون بديهية جدا ومليون شخص نصحك بيها.. بس لما بتتحط في موقف مؤثر في حياتك بتتعلم الدرس ده بطريقة أوضح وأقوى.. فأنا قررت في ٢٠٢٠ إن كل ما اتعلم حاجة من موقف اكتبها.. المهم حاولت ألخصها فمن الآخر كده أنا اتعلمت في ٢٠٢٠ الآتي:— Ahmed Amin (@AhmedAmin) December 30, 2020