دعاء فاروق عن منتقدي حملاتها الدعائية: بتشتم شتيمة قهرتني
شاركت الإعلامية دعاء فاروق، الجمهور بصور كشفت من خلالها عن بعض التعليقات المسيئة والتي تسببت لها في أذى نفسي.
نشرت “فاروق” الصور عبر حسابها الشخصي على موقع “إنستجرام”، وعلقت عليها معربة عن استيائها وحزنها، حيث كتبت: “مساء الخير.. بكتب البوست ده الساعة أربعة وتلت الفجر وأنا منهارة من العياط، كنت بسجل فيديو لمنتج وخد مني وقت رهيب عشان أمنتجه لأنه لازم ينزل بكرة بإذن الله، عندى شغل بدري في القناة بس أنا التزمت مع الناس إني أصورلهم فيديو الدعاية لمنتجهم، تعبانة ومرهقة بس بشتغل بكل إخلاص وهفضل اشتغل لآخر نفس إذا ربنا أراد وفضلت بصحتي”.
نرشح لك: أرزاق.. صراع الثعالب الأبدي ودراما الطموح والوشاية
تابعت: “وأنا بسجل الفيديو لقيت الست دي معلقة عندي بالطريقة دي فانفجرت في العياط، هو أنا بأذيكم في ايه يا جماعة لما بعلن عن منتجات لناس شقيانين برضه وعاوزين منتجاتهم توصل للناس وبيختاروا مشاهير يعلنوا عن منتجاتهم، ايه الأذية اللي أنا بسببهالكم لما بصور إعلان؟ ايه الضرر اللي بيقع على أي حد لما بيشوفني بعرض أي منتج زي كريم أو شامبو أو ملاية أو أي حاجة كلنا بنستعملها، ايه العيب في إني أعمل إعلانات عن أي حاجة”.
أردفت: “أصلك مذيعة برامج دينية، هو أنا بعلن عن حاجة حرام؟ هو أنا بشتغل الصبح مقريء وبالليل في خمارة؟ هو ايه يا جماعة القسوة دي، أنا تعبت من كمية البلوك اللي بعملها لناس بيدخلوا يشتموا ويهاجموا بمنتهى القسوة، المرة دي أنا بتشتم شتيمة قهرتني، وخلتني انفجرت من العياط، من فضلكم اللي مش مرتاح يمشي من الصفحة من فضلكم ده باب رزق واتفتح لناس كتير قوي سيبوا الناس تشتغل لو أي حد مكاني”.
أضافت: ” لو اللي بيشتم شخصيا مكاني واتفتح له باب رزق بالحلال هيجري عليه، ومجنون اللي يلوم حد بيسعى وبيشتغل، اتقوا الله في الكلام اللي زي السم اتقوا الله في الأذية اللي بتحدفوا بيها الناس، اتقوا الله، عارفة إن فيه ناس كتير محترمين بحمد ربنا على وجودهم ودعمهم كل يوم، بحمد ربنا على نعمة الناس المحترمة اللي بتحبني اللهم دمها نعمة واحفظها من الزوال بس أنا مشاعري كده أي حاجة وحشة بتقهرني ومش بعرف أبلع الكلام اللي زي الدبش، بيمرضني وبيتعبني، من فضلكم راعوا مشاعر الناس الكلمة بتوجع وبتقهر وبتمرض بلاش تضايقوا الخلق اتقوا الله”.
View this post on Instagram