ردا على رسائل متابعيه.. تامر حسني: مش في ايدينا غير الدعاء

شارك الفنان تامر حسني، جمهوره بالأمس بمنشورًا دعاهم من خلاله تفريغ الطاقات الفكرية والتحدث عن كل ما يشغل بالهم، متعهدًا لهم بالرد على كل ما سيكتب.

وبالفعل جاء نشر “حسني” اليوم عبر صفحته الرسمية على موقع “فيس بوك” منشورًا رد فيه على كل متابعيه، وكتب الآتي: “من امبارح وأنا بحاول أقرأ كل تعليقاتكم وطبعاً تأثرت جداً ولقيتني غوصت جوه ماسورة طاقة سلبية رهيبة بس التحدي إني استوعبها كلها وأخرجها لكم إيجابية أقسم بالله قاعد أقرا تعليقاتكم من امبارح متحركتش من مكاني”.

نرشح لك: تامر حسني يستطلع رأي الجمهور لاختيار أغنية كليبه الجديد

تابع: “قسّمت الردود على كل المواضيع وبرضو بقول إن ردودي نابعة من أخ ليكم وإنسان عاش تجربة كبيرة من الظلم والنجاح وشوفت فيها كل اللي هشرحه في البوست نوعية أسئلة الدنيا رايحه بينا على فين والكورونا والحروب والقدريات كلها اللي احنا كبشر ملناش ذنب فيها دي في إيد ربنا مش في إيدينا غير الدعاء والتفائل بالخير بس أنا هتكلم أكتر في اللي في إيدنا”.

أردف: “على قد ما قرأت وجمعت آراء من خلال الآراء المتشابهة اللي معظمها اتكلم عن الواسطة والمحسوبية والفشل والإحباط وضعف الثقة بالنفس والعنصرية تناقض المجتمع وعدم الأمان في الدنيا وعدم فرص العمل هحاول أرد على حد علمي وخبرتي المتواضعة في الحياة لعل شخص واحد يقتدي برأيي، مش هتكلم على اختلاف عادات المجتمعات لإنه موضوع نسبي ويتعلق ببلدك وتربيتك وعاداتك وأسرتك، لازمه شرح كبير وأسئلة كتير نسبية رايحه جاية”.

أضاف: “نيجي لموضوع الواسطة والمحسوبية وكل ما ذكرته في أول الكلام، هو فعلاً موجود بشدة وبقسوة، وأنا شخصياً مريت بيه وقهرته وأنا طفل وشاب فقير اتعرضت لكل ما ذُكر، يا جماعة بما إنكم عايشين في مجتمع فيه كدا يبقى مش قدامكم غير التميز الواضح؛ عشان كفاءتك تحرج أي مسؤول أو مدير، يعني لو أنت دلوقتي شخص ذو كفاءة عالية لازم تشتغل على نفسك تاني وتبقى ذو كفاءة عالية جداً جداً، ومتميز كمان والأهم يكون عندك ثقة كبيرة في ربنا ملهاش حدود، عشان هو شايفك وأكيد هيكافئك على مجهودك، بس أنت اتعب واعرف إنك تتعامل مع ظروف مجتمعك الحالي، هو عصر صعب بس ينفع تنتصر عليه”.

أكمل: “أما فكرة الفقر والظروف الصعبة عايزك تفهم إنك مش لوحدك خالص معظم الناس كدا، وفيهم مستسلمش لظروفه ومرضه وقرر يقهر الظروف دي، افتكر دي دايماً إن في واحد اسمه (لولا دا سيلفا) كان فقير، وخرج من المدرسة، وصباعه اتقطع واشتغل ماسح أحذية، وتعب وكافح واجتهد وصبر وفكر يتميز لحد ما وصل بقى رئيس جمهورية البرازيل”.

تابع: “نيجي للصفات المجتمعية اللي مزعلانا كلنا، وتغير قلوب الناس، والشتائم الجارحة في التعليقات، يعني تلاقي بعض الناس مباركين أوي لعلاقة شخص مصاحب واحدة، وبيتريقوا على شخص اتجوز واحدة، واحد محترم المجتمع والإعلام متجاهلينه، وشخص مهزق عاملين له سعر، الدنيا بقت فجأة ماشية بالعكس؛ تلاقي إنسان حثالة وسفيه بقى مشهور فجأة ومعاه فلوس، وجهات مسؤولة بتهتم بيه وتكتب عنه؛ لأنهم شايفين إنه ليه موردين فبيتاجروا بيهم وبعددهم، وسايبين توعية وإنقاذ فكر المجتمع وشبابه الصاعد، طبعاً دا شيء سلبي وأحد سمات عصرنا، محتاجين نفهم أن الأخلاق والسيرة الطيبة هي الأهم، واللي بتدوم يعني مش كل مشهور فهو صاحب سيرة طيبة، ما احنا ممكن نسمع عن حرامي مشهور أو سفاح مشهور، هل دا معناه إننا نقتدي بيه؟ أكيد لأ، خلوا اللي يلفت نظركم اللي سيرته كويسة ميغركوش الشهرة مع شخص فاسد”.

أردف: “السيرة الطيبة أهم وأرقى من الشهرة في المطلق، زي ما العطور لها رائحة نفاذة، القمامة أيضاً لها رائحة نفاذة، المهم انطباعك الطيب الدنيا كلها كدا، والشرنَفسه موجود وصوته عالي، كل اللي علينا إننا نتجاهل أي شخص يصدر فساد وتخلف، ونركز مع الناس اللي ممكن تفيدنا، نيجي لبعض الصفات الشخصية اللي تزعجنا زي: التسرع، وتضييع الوقت، والطيبة الزائدة، والشخصية المترددة، والشخص اللي كل شوية يحاول ويفشل، واللي بياخد كل حاجة على أعصابه، كل الحاجات دي عايزة تمارين حقيقي مع النفس، أولاً هطمن كل اللي كاتب عيوبه هو لمجرد إنك عارف عيبك ومعترف بيه دي أول خطوة إيجابية لعلاجك”.

تابع: ” لازم أنت تقوّم نفسك أنت تبقى مُعلّم نفسك، هو دا الصراع الدنيوي الحقيقي إنك تقاوم نفسك وتطور منها، بص لعيبك حالاً وكلمه قوله أقسم بالله هتخلص منك، قول هبطل مخدرات، هبطل سجاير، هبطل خمرة، هخس هتخن هتمرن، هواظب على الصلاة، مش هبص لحياة غيري، هبطل اللي مضايقني من نفسي أياً كان، وابدأ في التمرين كل ما تجيلك فكرة سلبية في دماغك، حط مكانها عكسها حط الإيجابي، كل ما تجيلك فكرة محبطة إنك مش هتقدر قول لأ، أنا هشوف الفكرة مليانة أمل وشايف نفسي قادر، أرجوكم كلكم لازم لازم لازم كل حد فيكم يشوف نفسه في خياله شخص ناجح، ومحقق اللي نفسه فيه، هتقدر تبني في خيالك طاقة جذب لشيء جميل، فمخك هيعمل كل جهده إنه يفكر أحسن، ويوصل للهدف الجديد اللي أنت زرعته قدامه”.

نرشح لك: تامر حسني يحقق حلم اثنين من المعجبات

واختتم: ” تنبيه! والعكس صحيح، أرجوكم قبل ما تناموا افتكروا حاجات حلوة تفرحكم، دي آخر حاجة تسيبوها في مخكم قبل ما تناموا؛ عشان هتصحوا عليها فلو وحشة هتصحوا متنكدين، لو حلوة هتصحوا فرحانين ويومكم أجمل.

تحديات المرض وصبرك عليه والتعايش بصدر رحب مصاحب بإيمان حقيقي لكلمة الحمدلله ، ليه أجرأعظم من أي حاجة، وخلي الأمل دايماً موجود، و لو حتى الدكاترة أكدولك إن مفيش أمل في الشفاء، اعرف إن ربنا قادرعلى كل شيء، ولو يا سيدي ربنا أراد بقاء المرض معاك، فاعرف إنه اختار لك أصعب إمتحان عشان شايلك أكبر أجر، بس قول من قلبك الحمد لله بإيمان تام مش كلام بس، وابدأ في رحلة جديدة في التعايش مع مرضك، وقول هنجح برضه لإن في نماذج كتير في الدنيا زيك وأكتر، ووصلوا لقمم النجاح، متبصش تحت رجليك، متبصيش تحت رجليكي، الفوز العظيم مش في الدنيا، والله الدنيا دي محطة بتأسس وبتبني فيها حياتك الأبدية”.