صدفة جاد للمتنمرين على وزنها: خليكم في حالكم

شاركت اليوتيوبر والشيف صدفة جاد، الجمهور بمنشور تحدثت من خلاله عن التنمر التي تتعرض له بشكل يومي من قِبل متابعيها بسبب وزنها.

نشرت “جاد” المنشور عبر صفحتها الرسمية على موقع “فيس بوك”، وجاء نصه كالآتي: “عندي في بيتي ٥ مرايات وعندي ميزان وعارفه إني تخينة تخينة تخينة وإني لازم أخس ومينفعش شكلي كده وجسمي أكبر من شكلي واللي يشوفني يقول إني أم حسن مش مراته وكل التعليقات الزبالة دي أنا عارفاها”.

نرشح لك: بالدموع.. صدفة جاد توجه رسالة لمنتقديها

تابعت: “أولا عندي مشاكل في الغدة وباخد علاج، وعندي وظائف الكلى عالية وباخد علاج، وعلاج المثانة، وعلاج لمجرى البول بسبب الحمل، وعلاج جرثومة المعدة، وعلاج للنقرص، وحاجة محدش يعلمها غير ربنا، يا ريت كفايه نسوان حشرية خليكم في حالكم وتعلقوا تعليقاتكم على المحتوى بس محدش ليه دعوة بصاحبة المحتوى كفايه تنمر وقرف بقى”.

أضافت: “عاوزين الواحد يولع في نفسه ولا ينتحر علشان شويه المرضى النفسيين يرتاحوا مثلا، ولو رديت وقولت لحد انت مالك ابقى مش محترمة وشبعت وتكبرت مش فاهمة أنا ايه علاقة ده بده ما أتخن ولا أخس ولا ياكلني قطر أنا مش عامية وشايفة نفسي وكل واحدة تخينة شايفة نفسها كفاية بقى إحباط في خلق الله وكل واحد حر يتخن ولا يخس محدش هيتعب مكان حد ولا حد بياخد مكان حد، حسبي الله ونعم الوكيل في المتنمرين”.

أردفت: “ومحدش يقولي دي نصيحة والناس خايفه عليكي أكيد محدش هيخاف على نفسه أكتر من نفسه، حسبي الله ونعم الوكيل في اللي بيأذي حد ولو بكلمة أو نظرة اتقوا الله شوية، اوعي تغركم الضحكة ولا الكلام الحلو اللي الواحد بيقوله، حقيقي الأبواب مقفلة على بلاوي متلتلة”.

اختتمت: “كل بيت وكل شخص عنده اللي يكفية وزيادة من الهم والتعب وممكن حد يقوله كلمة بسيطة من وجهة نظره تنزل زي النار عليه ومحدش هيحس بيه، أرجوكم كفايه بقى والمنشور ده فضفضة للناس المحترمة اللي هتحس وتفهم كلامي مش أكتر”.