دينا الشربيني: معنديش لحظات انكسار ومبحبش النكد

علقت الفنانة دينا الشربيني على ما يقال عن أن الأثقال التي تظهر وهي تحملها غير حقيقية، وقالت: “معقول هنزل الجيم علشان اشيل حديد لعبة، لا ده بجد والمدربة بتاعتي بحبها قوي”.

تابعت “الشربيني” خلال اتصال هاتفي لـ “ET بالعربي“، أن المدربة الخاصة بها هي التي تعرف وزن الأثقال التي تحملها، مضيفة: “أنا مبسألش علشان لو سألت هتخض”.

نرشح لك: دينا الشربيني تشارك في التوعية ضد مرض “ازدواجية الرؤية”

استكملت: “من وأنا صغيرة في النادي كنت بلعب حاجات كتير، بعدين كنت بلعب مثلا بوكس، كانت حاجات بقى متقطعة مع الجيم العادي ووقت الشغل غصب عني كنت ببطل، فببطل كذا شهر وبرجع تاني، وبرضو لعبت سكواش شوية وحبيته جدا”.

ذكرت أنها كانت تتمنى أن تجد رياضة تحبها وتستطيع أن تستمر في ممارستها حتى مع العمل، مضيفة أنها عندما تعرفت على المدربة الخاصة بها “سالي” وجربت رفع الأثقال شعرت بشعور جيد جدا، متابعة أنها بدأت عندما يكون لديها تصوير تؤدي التمرين في وقت مبكر من الصباح.

أكدت أن التمرين يفرق بشكل كبير في يومها ويمنحها طاقة إيجابية غريبة، مضيفة: “يمكن الولاد بالنسبة لهم عادي، لكن بيتهيألي البنات لو جربوا، مش يجربوا إن يخلوا جسمهم عريض، ولازم يبقى حد فاهم علشان هي بنت فلازم تبقى برضو كيوت وصغيرة”.

وعن ظهورها مبتسمة دائما، قالت: “الحمد لله، أنا مبحبش النكد، لازم كل حد يشكر ربنا على صحته وعلى نفسه وعلى حياته وعلى أهله وعلى حب الناس، حقيقي دي نعم كبيرة قوي على فكرة دي مش حاجة نعديها كده إنه واخدينها ده عادي ده موجود، لا”.

استكملت: “أنا مبحبش اتضايق كتير عموما، أكيد ساعات الواحد بيتضايق وإلا مبقاش بني آدمة ومبقاش بحس، بس مبحبش الزعل ياخد، بديله حجمه وكل حاجة بس مبحبش أطول فيه، لأن مفيش حاجة مستاهلة وبجد ربنا ده جميل جدا يعني هو أحن من أي حد في الدنيا، فلا مبيسبش حد زعلان، والزعل مش كويس ومضر للصحة”.

أردفت: “الحمد لله معنديش لحظات انكسار، مابسيبهاش يعني، إحنا اللي في أيدينا نضايق نفسنا واحنا اللي في أيدينا نبسط نفسنا”.