بمناسبة عيد الأم.. رسالة إسلام إبراهيم لوالدته

وجه الفنان إسلام إبراهيم، رسالة لوالدته بمناسبة عيد الأم الذي حل اليوم الأحد.

نشر “إبراهيم” عبر حسابه الشخصي على موقع “فيس بوك” عدة صور جمعته بوالدته وعلق عليها كاتبًا: “السنة دي كانت أصعب سنة في حياتي على الإطلاق مش لأي سبب في الدنيا غير لأن أمي تعبت، حرفيا كنت حاسس إني لا حول ليا ولا قوة وكأني طفل تايه في ملكوت الله أربع أيام وعيني مبتنشفش تقريبا أطول فترة عيطت فيها في حياتي أربع أيام مش قادر أحط لقمة في بقي وكأن معدتي معمولها بلوك لغاية ما ربنا استجاب لدعايا وأنا بعيط بحرقة وبتذلل له أنه يشفيها لغاية ما فاقت من الغيبوبة بفضل ربنا وساعتها بس حسيت إن روحي اتردتلي”.

نرشح لك:محمد أنور يعلن عن جزء ثاني من “إسعاف يونس”

تابع: “أنا طبعا وقتها مقولتش لأي حد ولا كتبت على السوشيال ميديا لإني مكنتش قادر أرد على حد ومكنتش عايز أضيع دقيقة يمكن تحتاجني فيها الدقيقة اللي عرفت قيمتها وهي جنبي عرفت يعني ايه أفضل أسمع صوتها كل يوم عرفت يعني ايه أشوف كلمة ماما على التليفون عرفت إن كل حاجة في الدنيا بتتعوض إلا الأم والأب ممكن تعوض المال الشغل الزوجة حتى الولاد لكن عمرك ما هتقدر تعوض دقيقة فاتتك من غير ما تكون جنب أمك وأبوك وعندي إيمان داخلي إن الرابط بين الأم وولادها مش مجرد رابط نفسي أو عاطفي لا في رابط بيولجي احنا خرجنا من الجسم ده وهنفضل متصلين بيه لا بد الآبدين لأن الحالة الصحية اللي أنا وصلتلها وقت ما تعبت ملهاش تفسير غير كده طبعا لو قلتلكم هي عملتلي ايه هى وأبويا في حياتي أعتقد دي حاجة تحتاج مجلدات”.

أردف: “على سبيل المثال لا الحصر في حاجات بكتشفها في شخصيتي بتسهل عليا حاجات كتير في الحياة بعرف إن السبب فيها تربيتك إني مثلا عمري ما ببص لحاجة عند غيري أو أتمنظر بحاجة عندي على غيري فمثلا العربية هي أربع عجلات ودركسيون بتوصلنا المكان اللي عايزين نروحه مش مهم أبدا موديلها طالما سليمة ومبتروحش للميكانيكي، البيت هو مكان نضيف من أربع حيطان وظيفتهم الستر”.

أضاف: “مظهرك أهم حاجة فيه النظافة الشخصية والهدوم المكوية والجزمة المتلمعة مش لبس البرندات اللي بالآفات الجنيهات، وسائل الترفيه بجميع أنواعها لو معانا تمنها هنعملها وهننبسط مش معانا فده مش نهاية الكون معني كده اسمه القناعة لو زرعته في ولادك يبقى كانك سيبتلهم فلوس الدنيا كلها حاجة عمر ما الإنسان بيقدر يكتسبها غير من طفولته وتربيته، ربنا يخليكم ويبارك في عمركم وأفضل خدام تراب رجليكم العمر كله وبالنسبة ليكي يا ماما كل سنة وانت طيبة يا أهم حد في الكون”.

يشار إلى أن إسلام إبراهيم، يعمل حاليًا على تصوير مسلسل “نجيب زاهي زركش” المقرر عرضه في موسم رمضان.

مسلسل “نجيب زاهي زركش” من إنتاج سينرجي ويشارك في بطولته بجانب الفنان يحيي الفخراني كل من الفنانة أنوشكا وهالة فاخر وإسلام إبراهيم، وهو من تأليف عبد الرحيم كمال، وإخراج شادي الفخراني.