إسراء عماد عن اعتداء زوجها: مامته قالت له لفها وارميها في البحر

كشفت إسراء عماد، الفتاة التي تعرضت للاعتداء بالضرب بـ “المطواة” من قبل زوجها، عن تفاصيل الواقعة، وقالت: “سبب المشاكل مامته وأخوه وخطيبة أخوه، وبعدين اتصالحنا وجه قعد معايا عند مامتي في البيت 3 أيام وبعدين مشي”.

تابعت “عماد” خلال مداخلة هاتفية مع برنامج “كلمة أخيرة” المذاع على شاشة ON وتقدمه الإعلامية لميس الحديدي: “مامته قالت أنا اعتبرته مات علشان رجعلي، روحت علشان أصالحه عند البيت عندهم، نزلت مامته شتمتني في الشارع، بعدها أنا قولتله مامتك شتمتني تاني وقبل كده ضربتني قدامك”.

نرشح لك: علامات تشير إلى تعرض الطفل لاعتداء جنسي

استكملت: “طلع من جيبه المطوة وفضل يضربني بيها في رقبتي وفي وشي كله لغاية لما وقعت في الأرض واتشاهدت، مسابنيش غير لما وقعت واتشاهدت، قام جاي شايلني ورماني في التاكسي، وضربني بالمطوة تاني تحت صدري، لقيت اتنين شباب معديين فشاورتلهم علشان يلحقوني يعني، دخل قال لي لو سمعت صوتك هفصلك رقبتك عن جسمك”.

أردفت: “اتصل بأخوه ومامته قال لهم أنا خلصت، مامته قالت له هحدفلك ملاية لفها بيها، وارميها عند بيت أهلها أو في البحر”.

ذكرت أنه كان يضربها ولكن ضرب عادي، وتلك المرة الأولى التي يحدث فيها ذلك، مضيفة: “من الصدمة كل اللي حسيت بيه إن فيه حاجة عمالة تدخل وتخرج في رقبتي ووشي وحاسة إن أنا نفسي راح، وقعت في الأرض وكل اللي قدرت أقوله الشهادة، كل اللي كنت بقوله بالله عليك عايزة اشوف ابني حتى لو ثانية واحدة بس بعدين أعمل اللي أنت عايزه”.

أضافت: “قال لي هخليكي تشوفي ابنك بس بشرط، تقولي إن ناس طلعوا عملوا فيكي كده مش أنا”.