نور قدري تروي موقف مؤثر جمعها بأسرة سمير غانم
شاركت الفنانة نور قدري، الجمهور بمنشور روت من خلاله تفاصيل موقف جمعها بالفنان الكبير الراحل سمير غانم، وزوجته الفنانة دلال عبد العزيز.
طرحت “قدري” المنشور عبر حسابها الشخصي على موقع “فيس بوك” وكتبت فيه الآتي: “عايزة أحكي موقف حصل معايا مع سمورة ومدام دلال وإيمي سمير غانم هذه العائلة اللي كلها كرم وجدعة أنا قلت أرد جزء من الجميل والحب اللي شفته منهم”.
نرشح لك: سمير غانم.. كيف تتصدر الترند بـ”الحب”؟
تابعت: “كنا من كام سنه قبل الثورة بنعمل في مسرح الليسيه مسرحية ( ترا لم لم ) مع أستاذنا وحبيبي رحمة الله عليه سمير غانم وكنا أنا وإيمي بنعمل بناته في المسرحية وكان ومحمد محمود وغسان مطر رحمه الله عليه وقعدنا نعرض المسرحية ٣ سنين وفي يوم أنا تعبت جالي حاجه اسمها (دوار حركي حميد) وأثرت على الأذن الداخلية، حاجة كده يارب محدش يشوفها أبدا وفي نفس اليوم اللي دخلت في المستشفى لقيت استاذه دلال وإيمي كانوا عندي في المستشفى يطمئنوا عليه ويطمئنوا من الدكاترة الحالة وصلت لفين وأستاذ سمير وقف العرض لمده لحد ما أخف بس للأسف فضلت في المستشفى ١٥ يوم لحد ما أعرف أشوف وأقف على رجلي تاني وفضل أستاذ سمير ومدام دلال متابعين حالتي لحد ما ربنا كرم ورجعت تاني أعرض معاهم”
أضافت: “كان دائما يدلع فينا ولما يقول إيفيه على المسرح والناس تضحك واحنا يتملكنا الضحك على المسرح تشوف في عينه كم من السعادة والفرح اللي اداها للناس وهو مبسوط بيهم وانت بتشتغل مع سمير غانم تعرف وتتعلم منه إزاي تجدد من نفسك وازاي تشتغل على نفسك وازاي تحترم وتساعد غيرك وازاي تطور من نفسك وازاي تحترم شغلك علشان تبقي حاجه كويسه لو فضلت أتكلم عنه محتاجه وقت كتير قوي”.
اختتمت: “الناس دي مواقفها مع ناس كتير قوي وفضلهم عليه كبير من أنظف وأنقى الناس اللي ممكن تتعامل معاهم في الدنيا كلهم ولا استثني منهم احد ربنا يحبب فيهم خلقه وتقومي يا مدام دلال على الف خير وترجعلنا سالمة بإذن الله. ويجعلها آخر الأحزان ويصبركم ويصبرنا جميعا ويطيب قلبكم على الوجع اللي انتوا فيه ويخليكوا لبعض”.
يشار إلى أن الفنان الكبير سمير غانم، توفي مساء الخميس الماضي، عن عمر يناهز 84 عامًا وسط حالة من الحزن الكبير بين الوسط الفني والجمهور.
وكان الإعلامي رامي رضوان، أعلن خبر الوفاة عبر حسابه الشخصي على موقع التواصل الاجتماعي فيسبوك، ونشر صورة الفنان الراحل، وكتب: “إنا لله وإنا إليه راجعون، وداعا حبيبي”.
كما كانت تأكدت إصابة الفنانة دنيا سمير غانم والفنانة دلال عبد العزيز والفنان سمير غانم بفيروس كورونا. خلال تصويرهم مسلسل “عالم موازي”، والذي خرج من المنافسة الرمضانية على إثر الإصابة. وخضع الثنائي لفترة عزل.