تامر أمين عن رحيل فرجاني ساسي: الصدمة صعبة على جمهور الزمالك
علق الإعلامي تامر أمين على أنباء اللاعب رحيل فرجاني ساسي من نادي الزمالك، وقال: “أنا رسالتي لجمهور نادي الزمالك، إنه أنا عارف إن الصدمة صعبة، وإن رحيل واحد من نجوم الفريق وأمهر اللاعيبة في الفريق شيء مش لطيف، لكن في النهاية دي أقدار الحياة وحال كرة القدم”.
تابع “أمين” خلال برنامج “آخر النهار” المذاع على شاشة النهار: “هو مش الزمالك مشي منه اللي أحسن من فرجاني ساسي 100 مرة، مشي منه حسن شحاتة وفاروق جعفر وحازم إمام بطلوا كورة، ناس أساطير، والزمالك موقعش، الزمالك كمل وفضل قلعة كبيرة في كرة القدم”.
نرشح لك: فرجاني ساسي يوجه رسالة لجمهور الزمالك
استكمل: “أرجو إن جماهير الزمالك متبقاش في حالة صدمة قوي، الإعلام الرياضي بيحسس الجماهير إن بعض اللاعيبة مولودة في النادي، يعني بعض الناس كتبت فرجاني ساسي ابن نادي الزمالك، زي ما كانوا بيكتبوا على رمضان صبحي في الأهلي ابن النادي، ويتقالك ده بياكل النجيلة، ده عنده استعداد يشيل كور في النادي، مفيش كلام من ده”.
أردف: “دول لاعيبة محترفة، ادفع تلعب، هو مبدأهم كده، مش هتدفع مش هلعب، هروح للي بيدفع، أرجوكم بلاش المشاعر الفياضة دي لأن ملهاش مكان الآن في كورة القدم، الآن في زمن الاحتراف”.