أكرم حسني: هيفاء وهبي أيقونة الجمال في الوطن العربي
علق الفنان أكرم حسني على فيديو كليب أغنية “لو كنت” التي تجمعه بالفنانة هيفاء وهبي، وتم طرحه الاثنين، وقال إنه كان يفكر في عمل أغنية منذ 5 أشهر، مضيفا: “أنا كنت بفكر في فترة كده، أنا لو مكنتش بني آدم كنت هبقى إيه، فبدأت تتحط الأفكار، إني ممكن أبقى مجلة أو أرنب”.
تابع “حسني” خلال مداخلة هاتفية مع برنامج “القاهرة اليوم” المذاع على شاشة ألفا اليوم، ويقدمه الإعلامي جمال عنايت والإعلامية بثينة توكل: “بدأت اكتب ولقيت إن الأغنية تستوعب إن بنت كمان أو وجهة نظر الست إنها لو كانت هتبقى حاجة هتبقى إيه، ومن هنا جت الفكرة في نجمة كبيرة زي هيفاء وهبي”.
نرشح لك: خلال أيام.. تامر حسني يطرح فيديو كليب “افتح قلبك”
استكمل: “علشان الأغنية بتقول لو كنت كتاب أنا كنت هبقى كتاب عن الجمال، ودي وجهة نظر الست، وهي أيقونة الجمال في الوطن العربي، هيفا غير إنها ست جميلة هي ست ذكية جدا وبتعرف تختار شغلها”.
أردف: “حالة الكليب كلها عاجباني وعاجبني تفاعل الناس مع الهاشتاج اللي عملناه امبارح، بدأوا يتخيلوا لو كانوا إيه هيبقوا إيه، والممثلين زمايلنا مشكورين بدأوا هما كمان يتفاعلوا، ومهدت للأغنية لما نزلت”.
اختتم: “ممكن نشوف فكرة جديدة نتعاون فيها، التعامل مع هيفا كان من أمتع الحاجات اللي اشتغلتها في حياتي، لأن في فرق بين إنك بتشتغل مع حد وخلاص وفرق بين إنك تشتغل مع حد عايز يعلي العمل، وأنا سعيد بالتجربة جدا”.
يذكر أن الفنان أكرم حسني، طرح فيديو كليب أغنيته الجديدة “لو كنت” التي يقدمها مع الفنانة اللبنانية هيفاء وهبي، عبر قناته الرسمية على موقع يوتيوب.
أغنية “لو كنت” من كلمات وألحان أكرم حسني، وتوزيع توما والكليب إخراج حسام الحسيني.