خالد الجندي لـ محمد حسين يعقوب: لو فيها نهايتي هحاسبك

علق الداعية خالد الجندي، على شهادة الشيخ محمد حسين يعقوب، أمام المحكمة في قضية “داعش إمبابة”، وقال: “بتاع دبلوم المعلمين يقولك إحنا بتوع الصلاة على النبى، لا أنت مش بتاع الصلاة على النبي يا عم الحاج، أهدى كده وصلي على النبي”.

تابع “الجندي” خلال حلقة الثلاثاء من برنامج “لعلهم يفقهون” المذاع على شاشة dmc: “أنت بتاع غزوة الصناديق، جاي النهاردة تقول أنا بتاع الصلاة على النبي جاي النهاردة تتبرأ؟”

نرشح لك: أحمد موسى يعلق على رفض محمد حسين يعقوب تصوير شهادته

أضاف مستشهدا بالآية الكريمة: “إِذْ تَبَرَّأَ الَّذِينَ اتُّبِعُوا مِنَ الَّذِينَ اتَّبَعُوا وَرَأَوُا الْعَذَابَ وَتَقَطَّعَتْ بِهِمُ الأَسْبَابُ وَقَالَ الَّذِينَ اتَّبَعُوا لَوْ أَنَّ لَنَا كَرَّةً فَنَتَبَرَّأَ مِنْهُمْ كَمَا تَبَرَّءُوا مِنَّا كَذَلِكَ يُرِيهِمُ اللَّهُ أَعْمَالَهُمْ حَسَرَاتٍ عَلَيْهِمْ وَمَا هُمْ بِخَارِجِينَ مِنَ النَّارِ”، موضحا: “أقسم بالله العظيم كأن القرآن نازل دلوقتي وبيتفسر دلوقتي والآية مش محتاجة شرح”.

استكمل: “حضرتك واقف في المحكمة النهاردة تقول أصل ده تحزب ودي حزبية بغيضة وأنا مش بتاع حزبية بغيضة، أومال لما قولت اللي بيننا وبينهم الصناديق، كانت مين اللي قالها؟ كانت أمي اللي قايلاها؟ أنتوا هتجننونا يا جدعان، انتوا فاكرين إننا مش هنحاسبكم، لو انطبقت السما على الأرض، لو فيها نهايتي هحاسبك، وتحاسبني يعني أنا برضو مش خارج الحساب، حاسبني”.

أردف: “إنما هتيجي النهاردة تقول دي حزبية بغيضة، أومال غزوة الصناديق كانت حزبية إيه؟ حزبية بسيطة؟ الحقيقة لعب، ضحك على الدقون، ما أنتوا شعب طيب وطالما استطيبك واحد هيعمل ما هو أكثر من ذلك يعني القادم مذهل، انتظروا المزيد والمزيد من سقوط هذه الأوثان البشرية اللي دمرتنا ودمرت مجتمعنا ودمرت حياتنا للأسف الشديد”.

أكد: “لا قداسة لأحد بعد رسول الله صلى الله عليه وسلم، كل إنسان يؤخذ منه ويرد، عود نفسك على كرامة اسمها كرامة النقاش، عود نفسك على حق اسمه حق الدليل، عود نفسك على متعة اسمها متعة الاختلاف، إنما تمشي كده منبطح تقوله أمين يا مولانا، يقولك أدبني يعقوب، رباني إسحاق، شيل يا بتاع أدبني يعقوب غسل أيده منك، غير مأسوف عليك أنت والقطيع اللي زيك غير مأسوف عليك، عرفت ليه قالوا عليكوا قطيع؟ بسبب ده، بسبب الكارثة دي”.

اختتم: “وأنا بطالب بمحاسبة كل إنسان دمر بلدنا وحاول يسعى لتدميرها لولا أن لطف الله بنا برجال نحسبهم هم الرجال يوم عز الرجال يعرفون الشرف يوم قل الشرف، اسمهم أبطال القوات المسلحة، بقائدنا وتاج راسنا الرئيس عبد الفتاح السيسي، رغما عن أنوفكم ورغما عن ذقونكم ورغما عن كل ما تتخيلنه من وسائل خداع وتنويم للأسف الشديد”.