القصة الكاملة لاستبعاد منتخب سيدات الطائرة الشاطئية من تصفيات الأولمبياد
قرر الاتحاد الإفريقي لكرة الطائرة الشاطئية استبعاد منتخب مصر للسيدات قبل انطلاق منافسات نصف نهائي التصفيات الإفريقية المؤهلة لأولمبياد طوكيو.
وكان منتخب السيدات قد تأهل إلى نصف نهائي التصفيات المقامة في المغرب وكان مقررا أن يواجه نيجيريا في مباراة سهلة صباح اليوم السبت.
نرشح لك: اليوم.. “بالبنط العريض” يكشف لماذا تنشر واشنطن بوست ونيويورك تايمز مقالات للإخوان؟
وجاء قرار استبعاد منتخب سيدات الطائرة الشاطئية بسبب إيجابية مسحة مدرب منتخب الرجال فقرر الاتحاد الإفريقي استبعاد البعثة المصرية بالكامل بسبب المخالطة.
كشفت دعاء الغباشي، لاعبة منتخب مصر للطائرة الشاطئية، عن تفاصيل الأزمة، ونشرت عبر حسابها الشخصي على موقع التواصل الاجتماعي فيسبوك: “بكل هدوء إحنا لاعيبة حلمنا من ٢٠١٦ نتأهل أولمبياد وبقالنا ٥ سنين بنتمرن عشان البطولة دي، تيجي البطولة وتكون في المغرب اللي هي البلد المنافس أصلا”.
تابعت: “عملنا مسحة قبل ما نسافر طلعت سلبي ومسحة أول ما وصلنا وبرضو طلعت سلبي وقايلين كلهم إن أغادير مفهاش كورونا وأنهم بيعملوا كده عشان يحافظوا على البلد أول ما وصلنا اتعمل مسحة وفضلنا ٣ أيام في الأوض عشان النتيجة تطلع ومرضوش يخرجونا من الاوضة غير لما النتيجة تطلع وطلعت سلبي الحمد لله.
من ٣ أيام فجأة قالوا كله ينزل يعمل مسحة مع إنهم أصلا مكنوش قايلين إن في مسحة هتتعمل تاني عشان المفروض إننا في فقاعة، فقاعة في فندق فيه ١٠٠ ألف شخص ونصهم سياح بره البطولة امبارح الساعة ١١ بليل بتوقيت مصر ١٢ قالوا مصر متخرجش بره الأوض عندهم حالة، حالة ازاي وامتى وكلنا كويسين قلنالهم مين قالو مدرب فرقة الرجال”.
استكملت: “طب هنعمل إيه يا جماعة قالوا هنلعب لحد ما اللجنة الطبية تاخد قرار ماتشنا النهاردة الساعه ٩ الصبح طبعا نمنا كلنا اللاعيبة بعد ما اتأكدنا إننا هنلعب بعد توتر وعياط وصويت.
فجأة نصحى على رسالة الساعة ٣:٣٠ توقيت مصر ٤:٣٠ متخرجوش من الأوض انتوا برة البطولة.
يرضي مين ده يا عالم يرضي مين.
دي لعبة وإحنا متأكدين منها المدرب سليم ومع العلم ممنوع حتى نجيب حد يعملنا مسحات تانية ولا حتى فكروا يعيدوا المسحة ولا أصلا شوفنا ورق المدرب اللي بيقولوا إنه إيجابي”.
أردفت: “إحنا ماتشنا الساعة ٩ الصبح يعني كام ساعة ماتش ضامنينه نكسبه نكون في النهائي إحنا مخالطين جميع اللاعبية ومخالطين فرقة المغرب والفرق اللي لعبناها والحكام والناس اللي في المدرجات اللي هما منظمين إحنا مخالطين رئيسة الاتحاد الأفريقي اللي هي رئيسة اتحاد المغرب أصلا.
يعني لو في فعلا حق يبقى المنتخبات كلها يتعملها مسحة اشمعنا مصر هي اللي إيجابي ولو إيجابي هتبقى إيجابي من مين من نفسها يعني، حد يلحقنا والنبي إحنا حلمنا فجأة بقى تراب ومش عارفين نعمل حاجة، يارب أنت حسبي ونعم الوكيل”.