منى زاهر: مخرجة "ليه لأ 2" مكانتش تعرف إني بنت أحمد زاهر
كشفت الطفلة منى، ابنة الفنان أحمد زاهر، عن تفاصيل خوضها تجربة التمثيل لأول مرة في مسلسل “ليه لأ 2” الذي يعرض حاليا على منصة شاهد VIP، وقالت إنها تبلغ من العمر 8 سنوات وجسدت شخصية سلمى ابنة الفنان أحمد حاتم خلال أحداث المسلسل.
تابعت “زاهر” خلال لقائها مع “ET بالعربي” أن المخرجة مريم أبو عوف ذهبت إليها في المدرسة وأجرت لها تجارب أداء قبل اختيارها للدور، مضيفة: “قالت لي طيب سلميلي على باباكي، ومكنتش عارفة خالص إن أنا منى أحمد زاهر”.
نرشح لك: بمناسبة أولى تجاربها التمثيلية.. رسالة أحمد زاهر لـ ابنته منى
تابعت: “لغاية لما روحت البيت وقولت لبابي ربنا كرمني، وبعدين قالي ربنا كرمك إيه وإيه اللي حصل؟ قولت له مريم قالت إني همثل، قالي مريم مين؟ قولت له مريم، وبعدها بكذا يوم بابا قالي مريم كلمتني وبعدين جالي دور سلمى”.
استكملت: “أنا لما بدأت أمثل مكنتش عارفة أي حاجة، لغاية لما اتعلمت ومريم علمتني، فلما عملناه ونزل ظهرت إني طبيعية ومش بمثل، ماما كانت بتحفظني أكتر لغاية ما ملك بقت تحفظني علشان مامي كانت بيبقى عندها شغل، ولما بتحفظني ملك بحفظ على طول”.
أردفت أن أسرتها شاهدت المسلسل قبل أن تشاهده هي، موضحة: “أنا مكنتش أعرف إنه نزل، كنت نايمة، بعدين اتفرجت معاهم، ولقيت نفسي حلوة، ليلى بتقولي أمورة، وملك بتقولي يا شاطرة يا منمونة، وبابي بيقول بصي منى شاطرة ازاي، ومامي بتقولي إني طبيعية خالص”.
وعن علاقتها مع الفنان أحمد حاتم الذي يجسد شخصية والدها خلال أحداث المسلسل، قالت: “إحنا كنا بنمثل مع بعض واتعرفنا على بعض بعدين بقينا صحاب، هو زي بابي بجد بس محدش أحسن من بابي بجد ولما بنمثل مع بعض بنبص لبعض وبابي بجد وكل حاجة، وبياخد باله مني ومرة ضهري كان بيوجعني ومكنتش عايزة امشي، هو شالني على اللوكيشن، وكان كيوت قوي معايا، أنا بقوله يا حتومي، وهو بيقولي يا ميني”.
اختتمت أنها تريد أن تمثل مع والدها أحمد زاهر، مثل شقيقتها ملك في مسلسل “لؤلؤ”.
مسلسل “ليه لأ 2” بطولة منة شلبي وأحمد حاتم وسارة عبد الرحمن ومراد مكرم ومها أبو عوف وتامر نبيل ويارا جبران ودنيا ماهر وريم حجاب والطفل سليم مصطفى والطفلة منى أحمد زاهر.