مايا مرسي عن أزمة "البوركيني": كل واحدة لها الحق تلبس اللي هي عايزاه
علقت الدكتورة مايا مرسي، رئيس المجلس القومي للمرأة، على بعض الأزمات المثارة مؤخرا، مثل منع بعض الأماكن ارتداء الفتيات مايوه المحجبات “البوركيني”، وأزمة طالبة آداب طنطا التي تعرضت للتنمر من قبل مراقبات بالامتحان بسبب ارتدائها فستانًا، وقالت: “إحنا مستهلكين، لأن عندنا قضايا تانية أهم كتير”.
تابعت “مرسي” خلال لقائها مع برنامج “يحدث في مصر” المذاع على شاشة MBC مصر، ويقدمه الإعلامي شريف عامر: “مدام السيدة اللي بتلبس المايوه البوركيني في المكان اللي مسموح لها تعمل ده، إحنا يعني ليه بناخد مساحة كبير في هذا الشيء”.
نرشح لك: فاطمة ناعوت: الإساءة غالبا تأتي من فتيات البوركيني لأصحاب البيكيني وليس العكس
استكملت: “المجتمع بيتغير للأسوأ، يعني إحنا بنمشي العكس، بستغرب جدا، تلاقي حد بينادي بالحرية على السوشيال ميديا وفي نفس اللحظة يعلق على حد تاني أنت ازاي تقول كده، طيب ما أنت لسه قايل حاجة، يعني البنات ادوهم بس الحق”.
أردفت مايا مرسي: “البنت مخرجتش بمايوه في الامتحان، هي راحت بفستان في الامتحان، والسيدة الفاضلة مش هتروح بالبوركيني في الشارع، هي هتروح بالبوركيني أو المايوه في حمام السباحة، نسيبهم إذا كان ده المسموح بيه وده الحق، إحنا وبندخل الكنيسة والجامع مغطيين شعرنا لأن ده الطبيعي، أهم حاجة إن إحنا نمشي في الشارع محدش يكلمنا، ورأيي في موضوع البوركيني إن كل واحدة لها الحق تلبس اللي هي عايزاه بما لا يضر الآخرين”.