تفاصيل برنامج "فابريكا" لتعليم الفنون والصناعات اليدوية

تواصل قناة “النيل للعائلة” عرض برنامج “فابريكا” الذي تقدمه الإعلامية رباب الخشن، يوم الجمعة الساعة 1 ظهرا.

وهو من البرامج القليلة التي تقدم محتوى عن الفن والصناعات اليدوية والديكور، وذلك من خلال استضافة شخصيات متخصصة في صناعات وفنون مختلفة، تعرض أعمالها، بل وتعلم الجمهور كيفية تنفيذها وإنتاج منتجات فنية ذات قيمة.

نرشح لك: مؤتمر “إعلام القاهرة” يقترح ميثاق شرف للإعلام الرقمي

من ضمن الحلقات، شغل الصدف والرسم على الزجاج والشمع وتفصيل القماش ولف الورق وعمل لوحات من الزلط، وغيرها.

وكانت الإعلامية رباب الخشن، عرفت الجمهور بها من خلال منشور عبر صفحة البرنامج الرسمية على موقع التواصل الاجتماعي فيسبوك، وكتبت: “اسمي رباب محمد الخشن، بحب الرسم من صغري.. كل اللي حواليا كانوا بيقولوا إني موهوبة.. بابا الله يرحمه برغم إنه كان طبيب.. ومالوش في الرسم.. صدق موهبتي جدا.. وكان بيشجعني على الرسم.. لدرجة أنه كان حبيبي بياخدني المكتبات الكبيرة ويسيبني اجيب كل اللي أنا عايزاه”.

تابعت: “وأنا في إعدادي وثانوي.. بقى يصورلي كتب للرسم وتعليم النسب من واحد صاحبه كان فنان، بقى يشتريلي اتوال وألوان زيت رغم صعوبة الرسم بيهم في السن ده بدون دراسة، بقيت طول الإجازة برسم.. كل الإجازات برسم.. وهو بيشتريلي كل اللي يساعدني إني مابطلش رسم.. ورسوماتي دي عندي لحد دلوقتي رصيد لا بأس به، وكان حلمي ادخل فنون جميلة.. الكلية الوحيدة اللي كنت اعرفها بتعلم الفن.. والصراحة دخلت علمي اللي اكتشفت بعدها أنه ماتعملش ليا أنا خالص، ورغم إني ماجبتش مجموع يدخلني فنون جميلة، بس ربنا عارف هو بيعملنا إيه.. وبيرتبلنا حياتنا ازاي، لأني اكتشفت واحدة من أجمل وأعظم الكليات في مصر.. كلية التربية الفنية.. عشقي”.

استكملت: “دخلتها وحبيتها واتعلمت فيها اللي عمري ما كنت هتعلمه في مكان تاني.. دكاترة فنانين.. بدرس كل المواد الفنية.. تصوير، تصميم، نحت، خزف، نسيج، أشغال خشب، معادن، طباعة، تصميم عرائس، خمس سنين من أجمل ما يكون، بالإضافة لسنتين تمهيدي ماجستير (ماكملتش).. جيد جدا وامتياز في كل السنين”.

استكملت: “درست المواد التربوية كمان.. علم نفس، صحة نفسية، إلخ، بسبب الكلية اشتغلت في التلفزيون، اللي كنت بتدرب فيه في الإجازة في قطاع القنوات المتخصصة في الديكور.. وكنت بعمل رسومات تساعد في البرامج.. لحد ما لقيت قدامي إعلان، عايزين مذيعات، قدمت من غير حتى ما اقول لماما ولا بابا (علشان بس لو سقطت مايبقاش شكلي وحش)..ونجحت الحمد لله.. في لجنة فيها ناس فطاحل في الإعلام ومن أقوى ما يكون.. اسم الفنانة شويكار خليفة، ملكة الرسوم المتحركة لوحده في اللجنة يكفي،
دخلت وحلمي إني اقدم برنامج لتعليم الفن.. وقتها كنت بتخيل أنه هيبقى للأطفال.. وبعد كل السنين دي، عافرت وزمايلي الحلوين فريق فابريكا معايا، وعملنا البرنامج، بس لكل الناس”.

أردفت: “ونويت إن الاستفادة منه تكون من باب العلم الذي ينتفع به.. واهديت الثواب لبابا الله يرحمه.. لأنه صاحب الفضل بعد ربنا، باختصار رغم مرور سنين كتير، فضل الحلم في دماغي مانسيتوش، وإن شاء الله هيكبر.. فابريكا هيبقى أكبر برنامج في مصر، هتقولولي جايبة الثقة دي كلها منين، هقول لكم لأني نويت نية خير وهي تعليم الناس، يبقى ثقتي حسن ظن، كل الرغي ده علشان أقول لكم إن اللوحات اللي تحت دي من شغلي، يا رب تعجبكوا”.