بدرية طلبة تدعم تامر حسني وتروي موقفا إنسانيا له

علقت الفنانة بدرية طلبة على هجوم الفنانة حلا شيحة ضد الفنان تامر حسني، بسبب عرض مشاهد رومانسي تجمعها به بفيديو كليب “بحبك” من فيلم “مش أنا”، الذي يعرض بالسينمات حاليا.

نشرت “طلبة” عبر حسابها الشخصي على موقع التواصل الاجتماعي فيسبوك، وكتبت: “أنا بحب كل زمايلي وبحسهم اخواتي وولادي وأساتذتب وفي النهاية بعد أي شغل بروح على بيتي وبتابعهم زي المتابع العادي وبحب أقول كلمة حق في الزملا القريبين مني واللي اتعاملت معاهم عن قرب”.

نرشح لك: والد حلا شيحة عن هجومها على تامر حسني: دي مش بنتي اللي اعرفها

تابعت: “ولازم اقولها في وقتها والنهاردة وقت كلمه حق في النجم تامر حسني اللي بعرفه عن قرب من يوم ما ظهر وأنا بشوف منه مواقف محدش يعرفها ولا يصدقها قد أيه هو بني آدم جبار لكن يكفي احكي لكم آخر موقف يوم عملية زميلي واخويا شريف دسوقي والمكالمات اللي كل يوم بيتحايل فيها يشيل شريف دسوقي في عنيه لكن كان الريس سبقه”.

استكملت: “ولما ظهرت حالة شبه حالة شريف وتكلفتها عالية وطلبت منه يتدخل قسما بجلال الله الموضوع ما موضوع فلوس لكن لو تسمعوا نبرة صوته وعياطه وحزنه على الحالة لما سمع الفويس بتاعها وهي فرحانة بالطرف الصناعي هتعرفوا من نفسكم البني آدم ده من جواه إيه وأد إيه إنسان مش بتاع شو غير كل دا كواليسه كلها حب واحترام لزمايله الصغير قبل الكبير، ومنتهى الاحترام والأدب واستحالة يتضايق أو يزعل حد ربنا يجبر بخاطرك وتعلى كمان وكمان تستاهل كل خير”.

من جانبه، علق الفنان تامر حسني على هجوم الفنانة حلا شيحة ضده، بسبب عرض مشاهد رومانسية تجمعها به في فيديو كليب “بحبك” من فيلم “مش أنا” المعروض حاليا بالسينمات.

نشر “حسني” عبر صفحته الرسمية على موقع التواصل الاجتماعي فيسبوك، وكتب: “نهاركم جميل يا أغلى الناس، الحقيقة عمري ما بتخيل إني ادخل في نقاش بالشكل دا مع زميل بحترمه وكان في بينا كل خير”.

تابع: “للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصياً ونتناقش بيني وبينك، فأنا مضطر أرد هنا برضو.

أولاً أنا عمري ما وعدتك إن الكليب مش هينزل دا محصلش أصلاً يا حلا مش أنا خالص اللي أوعد وأخلف، الحقيقة إني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة”.

استكمل: “وبعدين الفيلم بقاله 3 أسابيع في السينمات والكليب موجود جوة الفيلم، هو بالنسبالك الحرام إننا ننزل الكليب على اليوتيوب بس! إنما الكليب يتشاف جوه السينمات عادي؟ منطق غريب فعلاً يا حلا، وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه! هو مش أنتي اللي صورتيه ومثلتيه بنفسك وبمنتهى الرضا ولاّ حد أجبرك؟! وللتوضيح للجمهور الكريم أنا والمخرجة الأستاذه سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا وتليفوناتك كلها كانت بتقفل في وشنا، إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما إنتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا ومخليتيناش نعرف نعمل آفيش مجمع! وبقيتي تقفلي تليفوناتك وتكنسلي علينا كلنا”.

أردف: “وبعدين أي فيلم بيبقى ليه خطة مسبقة في الدعاية وأنتي عارفاها كويس ووافقتي عليها ودا كليب رومانسي يعني معقول كنتي عايزة المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً هو دا يُعقل؟! أنا زعلان منك جداً يا حلا على مفردات البوست بتاعك الغير موفقة ومستحيل هرد بطريقتك اللي فيها تجريح واتهامات باطلة ليا احتراماً لحاجات كتير يمكن فايتاكي بس مش هتفوتني وعلى فكرة أنا واثق إنك عارفة إني مستاهلش منك كدا وهكتفي بالتوضيح دا وربنا يهدي الجميع و يكتبلك كل الخير اللهم آمين”.

يشار إلى أن فيلم “مش أنا” حقق إيرادات مرتفعة منذ طرحه بدور العرض، والفيلم بطولة تامر حسني، وسوسن بدر، وماجد الكدواني، وحلا شيحة، ومن إخراج سارة وفيق.

بدرية طلبة بدرية طلبة