مخرجة فيلم "مش أنا" لـ معز مسعود: إحنا مالنا أنك اتجوزت حلا!
فيلم مش أنا
وجهت المخرجة سارة وفيق، رسالة للداعية معز مسعود وزوجته الفنانة حلا شيحة بعد تصريحاتهم الأخيرة، حول تبرأها من مشاهدها بالفيلم ومهاجمة الفنان تامر حسني.
كتبت “وفيق” عبر حسابها على “فيسبوك”، موجهة حديثها لمعز مسعود: “خلينا نتكلم بالحق بعد إذن حضرتك إحنا نشيل مشاهد ليه وبأي حق بعد ما صورت وأخدت أجرها كامل؟.. وإحنا مالنا أنك اتجوزتها؟.. أنت اتجوزتها فنانة وبتصور الفيلم دا ودي حاجة بينك وبينها إحنا مالنا؟ كمان بتقول كنت هتاخد إجراء.. إجراء إيه اللي تاخده؟ أنت ملكش أي حق تاخد أي إجراء”.
نرشح لك: “الشجعان اللي زيك بيراجعوا نفسهم”… رسالة معز مسعود لـ حلا شيحة
أضافت: “المفروض تشكرنا إننا مخدناش إجراء قانوني ضد مراتك اللي امتنعت عن تسجيل صوتها لدوبلاچ الفيلم وعن تصوير أفيش الفيلم اللي مدفوع فيه ملايين أنت متعملش حاجة غير أنك تشكرنا، لأننا شيلنا كل المشاهد اللي هي ماكنتش عايزاها وممكن ابعتهالك تشوفها عشان تعرف بس ازاي أنا والمنتج والفنان تامرحسني فتحنا الفيلم وعيدنا المونتاچ تاني على حساب الفنان تامر حسني ماديا عشان يرضي حلا”.
أردفت: “فيما يخص الكليب بقى هو حضرتك كنت فين من 21 يوم من ساعة ما الفيلم نزل ما هو الكليب في الفيلم ومصر كلها تقريبا شافت الفيلم ومحقق أعلى إيرادات كنت فين حضرتك وهي كانت فين؟ ما هو الفيلم كله على بعضه هينزل كمان في التلفزيونات بالكليب اللي جواه، وحلا وافقت تصور برضاها ورغم كل دا كلمناها كتير مردتش علينا ولا على رسايلنا”.
استطردت: “كان لازم بخبرتك تخليها تتواصل مع شغلها وتقفل الصفحة صح مش تخليها تقاطع شغلها وتورطها كدا دا لو أنت السبب في المقاطعه دي والله أعلم، ليه المواعظ العظيمة الجميلة دي منصحتهاش بيها، دا لو مش أنت اللي كاتب البوست أصلا”.
اختتمت: “أنا مكنتش ناوية أرد على حلا لأن تامر رد بمنتهي الأدب والاحترام ووضح كل حاجة وحلفني مااردش عشان خاطر نفسيتها بس أنت استفزتني بصراحة، ولو أنت اللي ارغمتها تكتب بوست بالشكل الساذج دا عشان تحافظ على منظرك قدام الناس فأنت فضلت نفسك على حساب حلا، وللأسف خليت الناس كلها تهاجم مراتك دا لو أنت السبب برضو والعلم عندا لله”.
مخرجة فيلم مش أنا
كانت الفنانة حلا شيحة هاجمت صباح اليوم الخميس فيديو كليب “بحبك” الذي طرحه الفنان تامر حسني وتظهر فيه بمشاهد من فيلمهما الجديد “مش أنا” مؤكدة على أنها فوجئت بطرح الكليب رغم وعد تامر لها وتأكيده احترام رغبتها.
وكتبت حلا عبر حسابها على إنستجرام تقول: “أنا اتفاجئت جدا ًبنزول كليب يجمع فيه مشاهد متفرقة من الفيلم و في ايام ذي الحجة ايام مباركة و خصوصاً بعد اخر بوست نزلته و وضحت فيه انا ايه ..و اتفاجئت اكتر خصوصا ًبعد وعد تامر حسني ليا وتأكيده انه حيحترم رغبتي و بعض الطلبات اللي طلبتها منه بكل احترام وود الصيف اللي فات و اكدلي انه حيحترم رغبتي ..احنا يمكن نجحنا بمقايس الدنيا بس صدقوني بمقايس ربنا احنا لم و لن ننجح، انا عارفة و متاكدة ان زملائي جواهم خير بس للاسف فتنة الشهرة و النجاح مش بتخلينا نشوف ونقيس الامور صح”.