نادية الجندي عن رشاقتها: عمري ما خدت أدوية تخسيس
عبرت الفنانة نادية الجندي، عن سعادتها بإعجاب الجمهور بآخر جلسة تصوير لها، والتي ظهرت فيها بمظهر شبابي.
قالت “الجندي” في اتصال مع تلفزيون اليوم السابع، عن سر جمالها: “أنا متصالحة مع نفسي وجوايا سكينة، والسر الكبير حب الجمهور”.
نرشح لك: أحدهم سائق “موتوسيكل”.. هند صبري: حببت من طرف واحد مرتين
وعن المحافظة على رشاقتها، قالت: “كل حاجة ليها تمن، المحافظة على شكلك كده معناها أنك بتحبي جمهورك فلازم الفنان يلتزم ويبقى قدوة، وفي حاجات كتير الفنان بيعمل فيها تنازلات وحرمان كتير قوي عشان يحافظ على رشاقته”.
أضافت: “أنا لا بسهر ولا بشرب ولا بدخن، حاجات كتير قوي مبعملهاش، بلعب رياضة وببعد عن الحاجات اللي بترهق البشرة”. مردفة: “حب الجمهور أكسير الحياة وهو اللي بيديني الطاقة الإيجابية عشان التزم وأكون في كامل لياقتي”.
أردفت: ” أنا مش بتجه لغير الوصفات الطبيعية ولا بحب أخد أدوية تخسيس، وعمري ما خدتها وبحب الطبيعة والبحر، وكل ما هو طبيعي بحبه”. مردفة: “الحمد لله لما يكون الإنسان عنده قوة إيمان دا شيء كويس بيأثر عليه وعلى شكله، وبيجى بعده الرياضة وحب الجمهور والناس”.
في سياق متصل، قالت: “عمري ما لجأت لعمليات التجميل، من يوم ما ربنا جبني ووشي هو هو، أنا ضد عمليات التجميل.. دا في ناس شكلها بيتغير تماما وتفضلي تقولي مين دي مفيش حتة معملتش فيها تجميل، لكن أنا مينفعش غير أكون نادية ومينفعش أغير شخصيتي اللي الناس حبتني بيها، ممكن أعمل وصفات إلا عمليات التجميل”.
تابعت: “في بعض الفنانات بسأل عنهم أقول مين دي، وأنا مينفعش حد يسأل عني يقول مين دي”.