حبسها زوجها بالمنزل.. الداخلية تستجيب لـ ايفون نبيل
محمد عبد المنعم
ايفون نبيل
أثارت البلوجر أيفون نبيل، حالة من الجدل والتعاطف معها بعدما ظهرت في حالة من الذعر خلال بث مباشر عبر حسابها الرسمي على “فيس بوك”، حيث كانت تستغيث من زوجها الذي قام بحبسها وأخذ منها أجهزتها الإلكترونية ويقوم بتهديها.
قالت “نبيل” في البث المباشر: “مساء الخير يا جماعة، دي أول مرة أعمل نوعية من الفيديوهات دي، ما كنتش حابة أطلع أقول الكلام دا، ولا اتكلم بالطريقة دي، لأني طول الوقت بديكم طاقة إيجابية، أنا حاليا محبوسة في بيتي، جوزي أخد مني اللاب توب والموبايل، وخبيت منه الموبايل دا علشان أعرف أطلع منه، غير إنه غير باسوردات معظم الصفحات”.
نرشح لك: بسبب سورة “البقرة”.. بلوجر سعودية متهمة بالإساءة إلى القرآن الكريم
أضافت: “فيه مشاكل بيني وبين زوجي من سنين، لكني عمري ما طلعت اتكلم عنها، ودائمًا بدي طاقة إيجابية، أنا بواجه تهديدات كتير قوي، وقولت المرة دي أقدر استعين بيكم يمكن الاقي حد ينقذني، مش عارفة أنزل من بيتي، وزوجي طلع آخر حاجة بيسجل مكالمات ما بيني وبينه، هو فيه أمان لحد بيسجل لمراته، أنا مش قادرة أسجل من جوه الصالة الفيديو علشان أولادي”.
تابعت: “أنا حياتي بتنهار بقالي 8 سنين بتهدد، كنت الأول بشتغل في قناة، قالي ما تنزليش ما تشتغليش علشان الأولاد قولت يمكن عنده حق، قعدت سنين ما بشتغلش، في مشاكل، اتحولت لخدامة في البيت، نظفي فوق التكييف، ومش عارفة أيه، وهي دي كل حاجة بعملها في حياتي فقط”.
واصلت: “فكرت في يوم من الأيام أيه ممكن يكون البديل، فقولت هصور فيديوهات في البيت، عمره ما رضي عني، إيه اللي أنتي بتعمليه ده، أنت حاجة عرة، أنت حاجة قليلة، أنت فاشلة كمذيعة، أنا ما كنتش بديكم أنتم الطاقة الإيجابية، أنا كنت بديها لنفسي، وبقيت أقوى بيكم، انتوا سند”.
أردفت: “أنا عاوزة اطلع من البيت وعيالي معايا، أرجوكم بلغوا أي حد مسؤول، لأنه مطلع رقم سفارة يسفرهم، خليهم في حضني، أنا دلوقتي محبوسة في بيتي مش عارفة أخرج منه، ومس معايا حد غير ربنا، أنا أبويا ميت، هو شغال في جهات كبيرة، وعارفة إنهم عمرهم ما هيقفوا معاه في الشر، لكن بتوجه لكل جهة كبيرة، أرجوكم حد ينقذني، أنا آخر حاجة كتبتها قبل الفيديو ادعولي، خلاص مش قادرة، 8 سنين بيهد فيا، بيقولي أنا ست فاشلة بكل المقايس”.
ذكرت: “قرأت عن النرجسية، وعرفت إنه شخص نرجسي، ورحت لدكتور وعرفت إنه عنده مشكلة، مشكلة النرجسية مش بتتحل، هو غير كل حاجة عني، أنقذوني، حياتي بتبوظ، عاوزة اطلع أنا وعيالي، تعبت، شخص بيتلون، هتبقى حياتنا كويسة، لكن يرجع يقول أنتي متخلفة هتعري عيالك، أنتي حاجة بيئة وقليلة، أنتوا شايفين كده؟”.
اختتمت: “شير للايف أرجوكم، أنا ساكنة في الزيتون، والله ما عارفة أعمل إيه، المرة الجاية مش عارفة هيعمل إيه، أنا رافضة الحياة دي تاني، بقالي 8 سنين بتعذب في ذل، كل الناس بتقولي بحبك، وهو أنتي مكروهة، وكل الناس أنتي ناجحة، وهو أنتي فاشلة، ربنا عوضني بالفيديوهات ليكم عن الشغل وأنا قادرة في البيت، لكن ليه عاوز تمنع عني دعم نفسي، يقول لي: دا وهم وفيك وناس ورا شاشات، عاوزة انفصل عنه وابعد، بخلع أو طلاق عاوزة أربي عيالي وبس، عارفة إنه ممكن يشيل اللايف في أي وقت، وربنا يسامحه على اللي بيعملوا فيا، حد يغيثني يا ناس حد ينقذني حقيقي حياتي بتنهار .. أنا مش عارفة اتصرف أنقذوني”.
وأكدت تحريات الداخلية صحة الوقعة، كاشفة أن المجني عليها استغاثت بسبب منع زوجها لها من استخدام مواقع التواصل الاجتماعي، واحتجازها وأطفالها داخل منزل الأسرة بالزيتون، كما أكدت التحريات أن الزوج المشكو في حقه اعتاد تهديدها بالإيذاء.
وأعلنت الأجهزة الأمنية بوزارة الداخلية أنها تحركت واتخذت إجراءاتها القانونية حيال الواقعة، في استجابة سريعة منها تجاه الفيديو والاستغاثة، وتم تحرير محضر بالواقعة، وإحالته إلى جهات التحقيق المختصة للتحقيق فيما جاء فيه، ولا تزال التحقيقات والتحريات مستمرة.