الطبيب صاحب فيديو السجود للكلب: اللي حصلي كان أوفر والناس مش فاهمة هزارنا

علق الدكتور عمرو خيري، رئيس أقسام الطب بجامعة عين شمس، وصاحب فيديو الممرض والسجود للكلب، على الواقعة، وقال: “اعذر كل من أساء الفهم لهذا الفيديو، وما حدث هو نوع من الهزار، لو عادل الممرض كان يشعر بالقسوة كان هيسيب العيادة ويروح أي عيادة تانية”.

تابع “خيري” خلال مداخلة هاتفية مع برنامج “الحكاية” المذاع على شاشة mbc مصر، ويقدمه الإعلامي عمرو أديب: “الفيديو حدث وهو عبارة عن مزاح، هو كان فيه كلب علشان يسجد له؟ إحنا في مستشفى خمس نجوم، كلب إيه اللي يسجد له، هو لفظ لا يليق وبعتذر عنه، لكن هو مش للنشر، وأي اتنين بيهزروا في أوضة مغلقة بيقولوا حاجات ممكن تساء لو نشرت”.

نرشح لك: بكى على الهواء.. أبرز تصريحات الممرض صاحب فيديو السجود للكلب

أوضح: “اللي حصل معايا إن تم قرصنة الواتساب بتاعي من شهرين، ناس من نمرة من أذربيجان وطلبوا مني ابتزاز مادي، عملتهم بلوك، يشاء القدر إن هما يعملوا هذا الكلام بعد كده وينزلوا الفيديو، طيب يعني أنا أعمل إيه أنا المجني عليه ولا جاني؟”.

استكمل: “هذا النوع من الهزار معتاد بعد العمل مش جوة العملية، مش مصيبة ولا حاجة، ما بعد الضغط الكبير اللي بيكون أثناء العمل، بيكون حالة تفريغ، لكن مش هنهزر وفيه عيان مستني برة عيادة أو فيه عملية داخلين عليها، حالة التفريغ بتبقى موجودة بالليل جدا أو خلصنا شغلنا”.

أضاف: “الممرض ده ابني، هو لو قعد قدامي النهاردة، ده ابني واخويا ده معايا ٢٥ سنة يوميا.. شعر بالإهانة لأن الواقعة انتشرت.. هل يعقل إن حاجة زي كده تنتشر في بلده؟ وهو من بلد فاضلة، فكانت فيه إساءة، الناس مش فاهمانا.. مش فاهمة هزارنا، بداية الحديث خالص، قعدنا نهزر، كان هو بيتهكم على الكلب، قولتله طيب بتتهكم على الكلب ليه؟ وكانت استكمال للهزار”.

أضاف: “أنا هخلي واحد يسجد لغير الله؟ هو أنا مش راجل حجيت وراجل اعرف ربنا، ازاي يعني؟ أنا راجل اعرف الله، هو أنا بوذي؟، نقطة الاعتذار ليه مفيش خلاف عليها، طبعا أنا هطيب خاطره، لأن هو اتضايق في بلده والمنظر ضايقه، وهو مجرد ما نبص في وش بعض هتنتهي كل حاجة.. هو مش مستني حتى اعتذار، بس ميكنش جنبه حد مأثر عليه أو تحت ضغط، لما حصل هذا النشر هو كلمني مرتين وقالي نعمل إيه؟ قولتله متقلقش، موجة وهتعدي متقلقش”.

واصل: “بس أنا كنت في الخارج معرفتش اطيب خاطره أو اخده في حضني، لكن هو راجل خادمني وقائم على حالاتي، وبيقوم بكل حاجة لمدة 25 سنة، لغاية ما أقابله واقابل أهله، أنا بقوله دلوقتي يا عادل متزعلش، ده كان بيقول عليا أبويا الروحي، هيكون فيه اعتذار ليه وللمجتمع واللي تأذى من كلام أنا مقولتوش علشان ينشر، دي حاجة اتسربت غصب عني، ومع ذلك اللي استاء أو وصله المفهوم بطريقة استاء منها، أنا بعتذرله وبقوله أنا راجل أستاذ وليا أجيال من الطلبة والأساتذة العظام”.

أشار: “اللي حصل معايا كان زيادة ليا أنا وأسرتي، اتشتمنا واتبهدلنا واتكفرنا أعتقد كانت أوفر جدا، إحساس الناس مغلوط، فيه ناس بتقول بنعذب، بنعذب مين ده الراجل بيضحك لآخر ثانية، هنعذب اخونا؟ واكل شارب معانا؟”.

سيرينا أهاروني التي أحبت رأفت الهجان