لمنع نشوب حرائق.. مسؤول يوضح طرق التعرف على عيوب الأجهزة الكهربائية
بسملة سعودي
طرق التعرف على عيوب الأجهزة الكهربائية
تحدث الدكتور حافظ سلماوي، الرئيس السابق لجهاز تنظيم مرفق الكهرباء وحماية المستهلك، عن كيفية معرفة عيوب تصنيع الأجهزة الكهربائية، وأعطى بعض التوجيهات للحماية من اشتعال الحرائق.
قال “سلماوي”، أثناء مداخلته الهاتفية ببرنامج “مساء dmc”، مع الإعلامية چاسمين طه، أن هناك أكثر من مصدر لنشوب حريق موضحا: “المشاكل دي ممكن تنشأ من مصدرين، مصدر منهم إن الجهاز نفسه مش موثق ضمن مواصفات عالمية وبالتالي ده هيؤدي إلى أن تكون عناصر الأمان الخاصة به غير مكتملة”.
نرشح لك: إبراهيم عيسى: أعقاب السجائر هي السبب وراء اشتعال الحرائق
تابع: “والعنصر التاني هو طريقة استخدام الأجهزة الكهربائية، نمرة واحد هو للأسف إن كلنا لما بنشتري أجهزة بيبقى في 3 أسلاك في الكبس، ف يا إما بنقطع هذا الكبس ونركب فيشة على سلكتين، المشكلة التانية هي الأرض ساعات كتير في مننا بيحس إنه بيتكهرب لما يلمس الفيشة أو الغسالة مثلا لو الأرض مبلولة”.
استكمل الدكتور حافظ سلماوي حواره: “اللي معندوش RV يحاول يوصل هذه الأجهزة بأي ماسورة للمياه، أو في المباني الجديدة لا بد أن يراعى هذا نظام التشغيل”.
ولفت إلى أنه يجب شراء الأجهزة وفقا لمواصفات عالمية وليست ذات مصدر مجهول موضحا: “تكون مواصفات عالمية يعني مشتريش من مصدر مجهول، في أجهزة أخرى زي الوصلات الكهربائية والمشتركات، هذه الأجهزة أيضا خطيرة جدا لأن ممكن يكون الجهاز بتاعي مسبق ضمن مواصفات عالمية ولكن المشترك اللي بوصل بيه ممكن يكون غير مسبق ضمن مواصفات عالمية، لازم أراجع التيار لأن حمل الجهاز لو أعلى من حمل الفيشة هينفجر”.
فيما أوضح بعض التوجيهات لمنع نشوب حرائق قائلا: “أول حاجة لو الفيشة اللي في الحيطة قدرتها أقل من قدرة الجهاز مؤكد هتسخن، تاني حاجة لو نوع الفيشة غير جيد هيحصل شرار بين الفيشة والكبس هيؤدي إلى تسخين الفيشة وهتولع لأنها نوع مش جيد أو هي مصممة لكبس عريض وأنا بستخدم فيشة رفيعة، تالت حاجة لا بد أن يكون هناك أجهزة أمان بسعة مناسبة في المنزل بحيث إنها تفصل في حالة وجود أحمال إضافية، آخر حاجة أشير عليها إن لو في جهاز مش بستخدمه كتير أقفله ومستخدمهاش لفترة وأفصلها لمجرد الاحتياط زي الكاتل وأجهزة التكييف”.