أبرز تصريحات الرئيس عبد الفتاح السيسي خلال الندوة التثقيفية للاحتفال بنصر أكتوبر

الاحتفال بنصر أكتوبر
شهد الرئيس عبد الفتاح السيسي، اليوم الأربعاء،  الندوة التثقيفية بعنوان “العبور إلى المستقبل” بمناسبة احتفالات القوات المسلحة بنصر السادس من أكتوبر، وتحدث في عدة محاور، نرصد أبرز تصريحاته في السطور التالية:

1- عايز أقول لأهالينا في سينا أنتم كان ليكوا دور دايما كجزء من شعب مصر، أنتوا جزء من شعب مصر، قبل 67 وبعد 67 وقبل 73 وبعدها وحتى الآن، يمكن الدولة المصرية مقدرتش في وقت من الأوقات تعمل الواجب معاكم، لكن إحنا بنحاول نشكركم ونرد جميل أهل سينا علينا كلنا.

2- وجه رسالة للفتاة البدوية ياسمين التي تعرضت وأسرتها لحادث الروضة الإرهابي، وقال: “إحنا بنتألم وأنتم شوفتوا مش بس الناس في سينا دفعت تمن الإرهاب، لا، حتى كل الدولة المصرية، أنتي شوفتي من أسرتك، لكن كل أسرة مصرية قدمت شهيد أو مصاب دلوقتي، كل أسرة من مصر يمكن مش في سينا لكن في الصعيد أو الدلتا أو القاهرة أو إسكندرية، كل محافظات مصر قدمت شهدا ظباط وصف وجنود وحتى اللحظة دي اللي أنا بكلمك فيها ما زال هذا الأمر، ما زلنا نقدم شهدا حتى يتم التخلص تماما من الإرهاب”.

نرشح لك: الشهادة الكاملة لـ اللواء سمير فرج في حق الرئيس عبد الفتاح السيسي

3- وتابع خلال رسالته للفتاة: “فلا تتألمي من قدر الله فينا، لكن اطمئني أيضا لقدر الله فينا بأيدينا كلنا تعود سينا أفضل مما كانت والخير والأمن والاستقرار يعود فيها وفي كل ربوع مصر، أنا بقولك وبقول للي بيسمعني عمر الشر مهما كانت قدرته يقدر يهزم أبدا الخير، دي سنن ربنا في الوجود، الشر استثناء والخير هو القاعدة، وعمر الاستثناء ما يهزم أبدا القاعدة”.

4- وعن تحديات عمليات تنمية سيناء وجميع محافظات مصر، قال: “فيه تحديات طبعا، وفيه صعاب، لكن بفضل الله سبحانه وتعالى هنتجاوزها وبكرة تشوفوا عطاء ربنا سبحانه وتعالى لبلدنا، وهتشوفوه وهتبقوا مستعجبين قوي إزاي وليه، علشان هو ربنا، علشان هو ربنا هيدينا كده، دايما تحيا مصر، تحيا مصر، تحيا مصر”.

5- وتحدث عن حالة عدم الثقة في تحقيق النصر بعد 1967، قائلا: “مفيش مقال اتكتب في جرايد مصر من وأنا عندي 9 سنين إلا لما كنت اقرأ عنه وعن حالنا وعن ظروفنا، ولكل الكتاب الموجودين باختلاف ألوانهم واتجاهاتهم مكنش فيه ثقة إن إحنا نقدر نعبر ونحقق ده”.

6- هنا التحية للقائد اللي خد القرار ده وتحمل مسئولية وللشعب والجيش اللي قدم بكل عزم وتضحية وكل التحية للشهداء وكل التحية للمصابين في هذه الفترة، مش هنسى شهدائنا ومصابينا ولكل مصر خلال الفترات اللي فاتت، عشان نبقى موجودين دلوقتي بفضل الله في نعمة، ولسه، بعزيمة الرجال هنحقق بقدرة أعز من كده.​

7- الدول العربية قدمت العديد لمصر خلال الفترة الصعبة التي مرت عليها من أول 3 يوليو 2013، مؤكدًا أنها قدمت دعمًا قويًا في أصعب الأوقات التي مرت على الدولة.

8- الرئيس الراحل أنور السادات تمكن من رؤية أن بعض الأدبيات والمفاهيم لن تستمر بعد حرب أكتوبر ولا بد من تجاوزها بمفاهيم جديدة، لذلك أطلق مبادرة السلام التي أثبتت قدرة “السادات” على قراءة الواقع بعد 40 عاما وأكثر.

نرشح لك: شاهد.. الفيلم التسجيلي صناع التاريخ

الاحتفال بنصر أكتوبر