مينا فريد يكتب :الفن الشعبي العربي (2) لما ضحك محمد فؤاد على شرحبيل
مقدمة لابد منها
- مينا فريد
في سلسلة المقالات دي هيبقى فيه رحلة صغيرة كده مع الفن الشعبي العربي مع واحد أو إتنين من فنانين كل بلد.. جهز نفسك لمزيكا جديدة عليك . مش الهدف من المقالات دي إنك تعرف كل حاجة عن الفن الشعبي للبلد دي .. ماهياش مقالات علمية ولا ثقافية ..هي مجرد محاولة إننا نسمع مزيكا جديدة .. بس لما تسافر معانا هتكتشف إنها مش جديدة ولا حاجة و إنها عدت عليك بصورة أو بأخرى فلو هتقرا المقال بس و مش هتسمع مش هتحس بأي متعة.. جهز نفسك و سماعاتك الرحلة طويلة بس ممتعة أول محطة كانت الجزائر و النهاردة مع السودان.
المحطة الثانية : السودان
السودان فيها ميكس ثقافات كبير .. فيها أفريقي و عربي متغرب و نوبي و كل فريق من دول ليه شخصية خاصة بيه … النوبي لينا كمصريين معروف, و لينا فيه زي السودان ماليها و كلنا حافظين قايمة طويلة من أغاني النوبة و فنانين النوبة زي أحمد منيب و طبعا منير بعده .. ده كله معروف فمش هنتكلم عنه … بس الحقيقة إننا واخدين كتير من الفن السوداني فعلا … مثلا آلة الربابة دي آلة سودانية .
بس المفاجأة في المزيكا السودانية إن السلم الموسيقي اللي فيها خماسي مش سباعي زي السلم الموسيقي المتعارف عليه … من أشهر رواد المزيكا السودانية في مجال مزيكا الجاز السودانية ” شرحبيل أحمد” و في أنماط موسيقى السامبا و الموسيقى اللاتينية “سيد خليفة” … كل واحد منهم له قصة معانا كمصريين … إزاي و مين دول ؟ هنعرف
مين شرحبيل أحمد ده ؟
- شرحبيل
شرحبيل ده فنان سوداني إتولد سنة 1935 في أم درمان و أول مرة يطلع فيها ع المسرح كان سنة 1956 في أم درمان تقدر تقول شامل بمعنى الكلمة كان بيغني و يلحن و يعزف على أكتر من آلة و كمان بيألف قصص و أغاني . مسمينه هناك ملك الجاز و أشهرأغانيه الليل الهادي اللي سببت صراع مع محمد فؤاد كبير. ليه ؟ الموضوع ببساطة إنه لما فؤاد أخد الأغنية سنة 1995 و ظبطها شوية ماكتبش على الغلاف إنها لشرحبيل و كتب إنها فلكلور نوبي ” على أساس إن أي حاجة سوداني تبقى نوبي” و دي فكرة غلط تماما و طبعاهي مش فلكلور ولا حاجة دي جاز . حصل نزاع قضائي كبير في وقت كانت حقوق الملكية الفكرية ليه مالهاش قيمة … فعدى الموضوع و خلاص ! بس اللي بيحبوا شرحبيل في السودان ما ينسوش أبدا القصة دي.
تقدر تسمعها من فؤاد و من شرحبيل نفسه و إنت تحكم مين فيهم أحسن .
من شرحبيل :
من فؤاد :
عموما محمد فؤاد في الموضوع ده ليه قصص كتير .. هيجيلها وقتها..
شرحبيل ربنا يديله طولة العمر لسه موجود و حقيقي هو يعتبر جيمس براون العرب و لسه بينتج. شرحبيل فنان رائع إسمع التراك ده هو الأشهر ليه ..
مين بقى سيد خليفة ؟
فاكر أغنية المامبو السوداني ؟ اللي كانت في فيلم “تمر حنة “في الخمسينات ؟ أهو اللي بيغنيها ده سيد خليفة…
إفتكرها من هنا..
- سيد خليفة
سيد خليفة مطرب و ملحن سوداني و مجنون بالمزيكا اللاتينية إتولد في الخرطوم سنة 1931 .. و إتعلم في كل مراحلة تعليم ديني و بعدين نزل يدرس في الأزهر في الجامعة .. بس فجأة قرر يغير حياته و يدرس في معهد فؤاد الأول للموسيقى و بعدها المعهد العالي للموسيقى العربية و إتخرج سنة 1958 و كان بدأ يشتغل في السينما المصرية و يبقى ليه شعبية كمان في أوساط المثقفين و الفنانين في مصر قبل ماحد حتى يعرف إسمه في السودان.. طبعا المامبو السوداني مش لحنه بس هوه أول حد قرر يحولها للعربية من مزيكا لفيلم إيطالي.
سيد خليفة لما رجع بلده بدأ من الأول تاني عشان يحقق نجومية هناك … في زمن ماكنش فيه لا ميديا و لا دش…
الموسيقار سيد خليفة إتوفى سنة 2001 .
رحلة السودان السريعة خلصت … المرة الجاية مزيكا تونسية..
يمكنكم التواصل مع الكاتب من هنا