فيفي عبده: "فكرت أفتح التربة.. ووصيت التربي"
قالت الفنانة فيفي عبده، إن الغيرة بين الفنانين قديما لم تكن مثل اليوم، إذ أن الكثير من الفنانين كانت تجمعهم علاقات طيبة في الفترات الماضية.
أضافت “عبده” خلال حلولها ضيفة على برنامج “أسرار النجوم“، مساء الخميس، مع الإعلامية إنجي علي، على “نجوم إف إم”: “زمان كنا كفانين نحب بعض ونتقابل دائما، دلوقت الدنيا اتغيرت خالص.. دلوقت مفيش أسرة أساسا، حتى الأسرة في البيت متفككة لكل فرد معاه الموبايل، وبقى الجمهور معاكي في كل حتة.. والموضوع دا مزعلني مع إني من أول الناس اللي دخلت أونلاين”.
نرشح لك: فيفي عبده: مش هخلي حد يحط لقب راقصة على مدفني
في سياق آخر، أشارت إلى أنها تشعر بحب السيدات لها كثيرا، مردفة: “الستات بيحبوني جدا جدا، وأول ما بيصحوا من النوم بيقولوا لما ندخل نشوف فيفي عاملة إيه النهاردة.. واللي زعلان بيقول أدخل أفرفش عن فيفي، لأني بديهم اللي أنا مفتقداه لأن أنا عندي سلبيات كتير جدا جدا.. خاصة بعد المشاكل الأخيرة ومطلوب إني أطلع أفرفش معاهم وأنا زعلانة”.
أضافت: “أنا فكرت أفتح التربة وأروح أقعد في الحوش عشان أتأقلم، أشوف هيعملوا إيه لما أروح.. دا أنا بوصي التربي من دلوقت بقوله أنت اللي هتقعد معايا سنين، ومكنتش بكلمه من سنين دلوقتي بقى حبيبي.. بقوله هبقى معاك خلي بالك مني وبقوله بلاش الورد عشان مينزلش ميه عليا”.
لفتت إلى أنها أخذت موضوع كورونا في بدايته بخفة ظل وضحك، لكنها بعد فقدانها لأحبائها شعرت بخطورته، مردفة: “الموضوع أثر عليا جدا وخلى نفسيتي زي الزفت وموبايلاتي قفلتها ومبقتش عايزة أكلم حد.. معرفش صفحتي كمان بقيت كئيبة كل ما أفتح أنزل حاجة لحد وأقول الله يرحمه”.
على صعيد آخر، كانت فيفي عبده، قد تعرضت مؤخرًا لهجوم شديد من الجمهور بعد نشرها صورة لها بملابس صيفية وهي في الساحل الشمالي، خاصة بعد وفاة الفنانة دلال عبد العزيز، حيث نشرت عبر حسابها الرسمي على موقع “إنستجرام” صورة لها في الساحل الشمالي بملابس زاهية معلقة: “يا مساء الفل من الساحل الشمالي أنا زعلانة وقلبي بيوجعني وربنا اللي عالم”.
وجاءت موجة من الانتقادات على الصورة في التعليقات حيث قال أحدهم: “عيب عليكي دلال لسه ميته”، وقالت أخرى: ” دي منظر وحده زعلانه..دي منظر فوفا وهيا بتستجم. ينهر احمر”، وعلقت ثالث: ” لا واضح الزعل حقيقي”.