فيفي عبده: "الراقصات عندهم قيم ومبادئ"
أبدت الفنانة فيفي عبده، إعجابها بشخصية الفنانة الراحلة تحية كاريوكا، مشيرة إلى أنها كان لديها مواقف سياسية مشرفة كمساعدتها للرئيس الراحل محمد أنور السادات.
أضافت “عبده” خلال حلولها ضيفة على برنامج “أسرار النجوم”، مساء الخميس، مع الإعلامية إنجي علي، على “نجوم إف إم”: “أنا كنت بخلص شغل وأروحلها السيدة زينب ألاقيها قاعدة بتأكل الناس وبتغسل المواعين بنفسها، وكانت بتختم القرآن في رمضان”.
نرشح لك: فيفي عبده: “الرقص في دمي”
تابعت: “الدين نظر.. منقدرش نقول كل الناس ملايكة، كل مهنة فيها كده وفيها كده”. لافتة إلى أن السينما تقدم الراقصة بصورة خاطئة، وهو الأمر الذي يشعرها بالضيق.
أردفت: “أنا مش على راسي بطحة، لازم يعرفوا إن عندنا قيم ومبادئ.. دا فن ولغة مش محتاجة ترجة، ودي الفن كله على أوروبا محدش هيفهمه لكن إحنا مش محتاجين ترجمة”.
كما قالت الفنانة فيفي عبده، إن الغيرة بين الفنانين قديما لم تكن مثل اليوم، إذ أن الكثير من الفنانين كانت تجمعهم علاقات طيبة في الفترات الماضية.
أضافت: “زمان كنا كفانين نحب بعض ونتقابل دائما، دلوقت الدنيا اتغيرت خالص.. دلوقت مفيش أسرة أساسا، حتى الأسرة في البيت متفككة لكل فرد معاه الموبايل، وبقى الجمهور معاكي في كل حتة.. والموضوع دا مزعلني مع إني من أول الناس اللي دخلت أونلاين”.
في سياق آخر، أشارت إلى أنها تشعر بحب السيدات لها كثيرا، مردفة: “الستات بيحبوني جدا جدا، وأول ما بيصحوا من النوم بيقولوا لما ندخل نشوف فيفي عاملة إيه النهاردة.. واللي زعلان بيقول أدخل أفرفش عن فيفي، لأني بديهم اللي أنا مفتقداه لأن أنا عندي سلبيات كتير جدا جدا.. خاصة بعد المشاكل الأخيرة ومطلوب إني أطلع أفرفش معاهم وأنا زعلانة”.
أضافت: “أنا فكرت أفتح التربة وأروح أقعد في الحوش عشان أتأقلم، أشوف هيعملوا إيه لما أروح.. دا أنا بوصي التربي من دلوقت بقوله أنت اللي هتقعد معايا سنين، ومكنتش بكلمه من سنين دلوقتي بقى حبيبي.. بقوله هبقى معاك خلي بالك مني وبقوله بلاش الورد عشان مينزلش ميه عليا”.
لفتت إلى أنها أخذت موضوع كورونا في بدايته بخفة ظل وضحك، لكنها بعد فقدانها لأحبائها شعرت بخطورته، مردفة: “الموضوع أثر عليا جدا وخلى نفسيتي زي الزفت وموبايلاتي قفلتها ومبقتش عايزة أكلم حد.. معرفش صفحتي كمان بقيت كئيبة كل ما أفتح أنزل حاجة لحد وأقول الله يرحمه”.