بسبب منة عرفة وزوجها.. محمد نجاتي يتقدم بشكوى لنقيب الممثلين

دنيا شمعة

أعلن الفنان محمد نجاتي تقدمه بشكوى لنقيب الممثلين أشرف زكي بعد أزمته مع الفنانة الشابة منة عرفة وزوجها محمود المهدي وأزمة انفصالهم بسبب أحد مشاهدها معه.

قال “نجاتي” خلال لقائه مع “et بالعربي“: “بدأ يبقى عندي مشاكل في البيت، مراتي بقت تسألني إيه المشاهد دي اللي تخلي اتنين ينفصلوا عن بعض، وولادي في المدرسة الناس بتقولهم باباكم سبب انفصال منة عرفة.. والموضوع كبر وأنا مش عارف ليه”.

نرشح لك:محمد نجاتي لـ منة عرفة: “مش عايزة حد يلمسك متمثليش”

أضاف: “زوجها محمود المهدي بيتهمني إن الكلام ده محصلش، اللي محصلش إن الطلاق بسبب مشهد قياس النبض، لكن اللي حصل انه بسبب مشهد إني هشيل منه.. وأنا ماشلتهاش فليه يحصل الانفصال؟”.

أردف: “دي حاجة ماليش علاقة بيها خالص دي حاجة تخص المخرج والمؤلف والشركة المنتجة، وبالفعل قدمت شكوى لنقيب المهن التمثيلية الدكتور أشرف زكي عشان تم طرح اسمي في حكاية أنا ماليش علاقة بيها، وتم تكذيبي على السوشيال ميديا وده يهيني تماما، ولسه فيه مشهد هضربها فيه بالقلم فعلى حسب قرار النقابة هعرف هضربه بقى ولا لأ”.

كان الفنان محمد نجاتي، علق على الشائئعات التي لاحقته بأنه سبب طلاق منة عرفة وزوجها.

أشار إلى أن المشهد الذي تسبب في الأزمة كان إغماء منة عرفة، إذ أنه يلعب دور طبيب نسا، وكان عليه أن يكتشف حمل شقيقته من وراء العائلة حتى تتصاعد الأحداث الدرامية.

لفت إلى أنه كان من المفترض أن يغمى على منة ويحملها ثم يكشف عليها ليكتشف الحمل، متابعا: “رفضت منه أنها تتشال، قولتلها أنا معنديش مشكلة إحنا في النهاية بنمثل مشهد مطلوب مننا، وأنتي أصلا أختي في الحقيقة وطالعة بدور أختي، فطبيعى جدا أنا اللي اشيلك.. المهم حصلت مشكلة وقولتلهم خلاص متعملوش المشهد ده أو اعملوه من غيري”.

أضاف: “المشهد اللي بعديه.. المفترض إني بكشف عليها بعد كده بكتشف أنها حامل، هكشف عليها ازاي من غير ما أجس النبض! فقولتلها أنا هجس نبض إيدك، قالت لا مش هينفع بردو، فهنا أنا عملت مشكلة، ما هو مش معقول بقى”.

تابع: “طالما أنتي مش عايزة حد يلمسك، خلاص متنزليش من البيت بقى أصلا ومتمثليش.. فصممت إن أنا أعمل دوري كما يجب وعملت النبض ده وقيست حرارتها، أنا كده معملتش حاجة غلط.. أفاجئ تاني يوم كل الناس بتقولي المشهد ده كان سبب في انفصالهم!”.

على صعيد آخر، كانت منة عرفة، قد كتبت عبر خاصية القصص القصيرة على حسابها الشخصى على “إنستجرام”: “من أصعب اللحظات اللي ممكن تعدي على أي ست لحظة الانفصال وخراب البيوت الطلاق يهتز له عرش الرحمن لكن انتوا يمكن عشان بتسمعوا عن بيوت بتتخرب كل دقيقة، فابقى أبغض الحلال عند الله بالنسبة ليكم نكتة أو حاجة تتمسخروا عليها، رهان بتعملوه مع بعض على إننا مش هنكمل، أو مادة خام للشماته فينا، خراب البيوت عمره ما كان حاجة سهلة على الست أو على الراجل أو على أهالينا، في عز ضعفي وحزني وكسرتي اللي ربنا ما يكتبها على أي ست مرحمتنونيش، ولا قدرتوا إني في موقف لا أحسد عليه وشمتانين فينا.. قد ايه انتوا ناس متعرفوش ربنا ولا في قلوبكم رحمة”.