رنا رئيس: رفض والدتي منعني من التمثيل في سن صغير
محمد هيثم
قالت الفنانة رنا رئيس، إنها اتخذت قرار التمثيل منذ كان عمرها 4 سنوات، مشيرة إلى أن والدتها لم تكن موافقة بسبب خوفها عليها.
أضافت “رئيس” خلال لقائها في برنامج “السفيرة عزيزة”، مساء الثلاثاء، المذاع على قناة “dmc” مع سناء منصور، وجاسمين طه: “قررت أمثل من وأنا عندي 4 سنين، ووالدتي مكنتش موافقة خالص، ولما قولتلها إني عايزة أمثل قالتلي لا انتي لسه صغيرة، ورفضت بسبب خوفها عليا، وأي أم بتبقي خايفة على ولادها”.
نرشح لك: رنا رئيس عن ماجد الكدواني: ممثلي المفضل وأعتبره أب
تابعت: “من ضمن الحاجات اللي شجعتني شغل والدتي، لأنها كانت ميكب ارتست، وكنت بشوف الحاجات في الوسط من وأنا صغيرة بروح مثلا لوكيشن، ودي من الحاجات اللي أدتني دافع إني عايزة أمثل، أو من الحاجات اللي أبهرتني”.
وعن علاقتها بالدكتور يحيى الفخراني، قالت “رئيس”: “دكتور يحيى الفخراني قيمة فنية كبيرة جدا، وكان حلم من أحلامي إني أكون مع دكتور يحيى الفخراني، وده ضافلي كتير جدا وخلاني أشوف حاجات مكنتش شايفاها، وعلمني حاجات كتيرة أوي”.
أضافت: “دكتور يحيى علمني الالتزام، وعلمني إزاي الإنسان يبقي طبيعي أكثر، وإزاي يوزن الحاجة ويبقي قادر يحب شغله، لأنه لو حب شغله هيعرف يقدم فيه حاجة كويسة”.
أردفت: “كانت توجيهاته دائما أن أنا لازم أبقى طبيعية، وكان بيقولي أعملي اللي انتي عايزاه، لأن اللي انتي حساه دائما أصدق”.